Lacazette-a'n goal a khung nawn

Goal hmaah Alexandre Lacazette ke a hmui chhunzawm, Arsenal striker hian Ningani zan khan Olympiacos lakah goal khat khungin a club hi Europa League last 32-ah 1-0 in hnehna a chanpui.

Gunners hmatawng hi match kua ngawt goal khung loin a awm hman, an match hnuhnung zawka Newcastle an hneh ṭumin goal a khung - a match zawnin goal a khung ve leh ta.

Arsenal manager Mikel Arteta chuan, "Goal a khung a lawm dan khan a boruak tawn chu a sawifiah, a ṭhiante hnen aṭangin thlawpna a hmu ṭha hle bawk a ni," tiin a sawi.

Spanish manager Arteta kaihhruaina hnuaiah Arsenal an insiamṭha mek, an match hnuhnung pathumah goal chhuah loin hnehna an chang thei. Pathianni zan dar 10:00 hian Emirates Stadium-ah Premier League khel turin Everton an mikhual zui leh ang.

Toffees hi Arteta-a'n player a nih laia a vanglai hun a hmanna pakhat a ni, coach Carlo Ancelotti kaihhruaina hnuaia harhtharna chang mek an nih ve tho avangin an inkhel tur hian ngaihven a hlawh.