Zaninah Jeje-a'n MPL8 KickOff dawn

Mizoram Premier League Season 8 chu zanin dar 6:30 hian Lammualah KickOff a ni dawn a, Mizo footballer zinga thleng sang ber Jeje Lalpekhlua'n a kickoff ang. 

India striker Jeje chuan, "KickOff-tu ka ni tur hi phu lo ka inti a, dinhmun sang taka min dahtu MFA chungah ka lawm takzet a ni," tiin Vanglaini a hrilh.

MPL Kickoff hmasa ber hi kum 2012 khan India ram footballer zinga hming dai tawh lo tur Bhaichung Bhutia-a'n hawnna a nei.

Sikkimese Sniper  Bhaichung-a'n bul a ṭan a, hemi hnu hian tualchhung football-in kawng dik zawh chhoin Mizoram chu India ram football hmun pawimawh a ni pha ta hial. MPL2 leh MPL3 kickoff hun chu MFA president Lal Thanzara'n a hmang.

Tualchhung football sawhngheh nan MFA chuan grassroots football kalpui chhoin AIFF-in grassroots football vangin MFA a chawimawi hial. MPL4-ah chuan  grassroots hmeichhia leh mipa naupang ten kickoff an nei a, hei hian Mizoram football chu kil tinah a ṭhang tih a lantir.

MPL5-ah AIFF vice president Larsing Ming a rawn lang a, ani hi Mizo footballer tam tak chher chhuaktu club Shillong Lajong neitu a ni bawk. MPL6-ah Indian Super League hlawhtlinna tura an thluak bur Chirag Tanna-a'n kickoff a rawn nei a, ISL bika Chief Operations Officer chuan, "Indian football tan MPL hnathawh hi a hlu a ni," tiin Mizoram chhunga inelna sang ber chu a fak hle.

MPL hnuhnung berah hetih hunlaia Mizoram sports minister Zodintluanga'n kickoff a nei a. Zodintluanga chuan khelmual ṭha (artificial turf) hmang ṭangkaitu MFA a fak a, sum ṭhahnem tak senga sorkarin khelmual ṭha a siam zarah Mizo tlangval tam takin eizawnna an hmu chu lawmawm a tih thu a sawi bawk.

MPL ṭan a nih khan Jeje Lalpekhlua hi Indian Arrows tana a chet ṭhat avangin player lar tak ni tawh mah se Indian player vantlang chunglam tia sawi theih chauh a la ni. Hnahthial tlangval hi 2012 khan Pune-ah la awmin Goan club ṭha Dempo a zawm a, beisei angin a hlawhtling bik lo.

Jeje hian risk lain Mohun Bagan a pan a, I League champion ngai lo Kolkata club hi India rama inelna sang berah a champion pui. India ram football hmunpui Kolkata-ah Jeje-a'n hming a chher a, Mariners hi I League bakah Federation Cup-ah a champion pui bawk. 

Indian Super League rawn awm chhoin Chennaiyin FC-ah rinrawl a ni a, ISL nomawi vawi hnih chawi tawh striker hian India tan pawh vawi 53 zet a khel tawh. Tunah chuan Hnahthial tlangval hi India football legend Bhaichung Bhutia leh Sunil Chhetri te nen an khaikhin tawh hial.

India striker Jeje-a chuan, "MPL hi Mizo football tana danglamna thlentu a ni a, India ram club ṭhaa coach-te pawhin MPL hi an ngaihven a, player zawn nan an hmang. Mizo footballer ṭha chherchhuaktu league hi kan ngaihlu tur a ni a, football ngainatute chuan kan league hi a hmun ngeiah kan en tur a ni," tiin Vanglaini a hrilh.

MFA-in India Junior team-a trial tura an thlan aṭanga che ṭha chho Jeje chuan , "Ṭum dang ang lo takin KickOff zawh hian FC Venghnuai leh Electric Veng FC te an inkhel nghal dawn a, hei hian Lammual kal a timanhla lehzual ang. MPL KickOff-ah Mizo mipuite kal ngei turin ka sawm e," a ti.