MPL kan nghak chhuak ta

Mizoram Premier League Season 8 match hmasa ber chu zanin dar 7:30 hian Electric Veng FC leh kai thar FC Venghnuai ten an khel dawn.

I Day Football final-ah club pahnih hi intawngin inkhel hmuhnawm tak kan hmu, MPL-ah a hmuhnawm zual ang.

MPL8-ah hian team pariat champion lai Aizawl FC, Chhinga Veng FC, Mizoram Police, Chanmari FC, Electric Veng FC, Chawnpui FC leh Ramhlun North te an inel dawn. 

Vawi hnih ṭheuh an intum kual  ang a, a sang paliin semifinal an khel ang. Season liam ta khan AFC, Chhingcows, Police leh CFC te an lut - tun ṭumah pawh team ṭha pali la ni  mah se Electric Veng FC leh FC Venghnuai te sawi bo theih an ni lo.

Tualchhung football club-te tana MPL dawta hlu bera ngaih chu I Day Football a ni a, nomawi inchuhnaah inkhel hmuhnawm bik an pho chhuak.

Electric Veng FC-in an club kum 25 tlin kumah nomawi an chawi a, veng boruak a ṭha. FC Venghnuai pawh an phur vanglai tak a ni a, beisei loh taka I Day Football final an thlen hnuah harhtharin an ban phakah MPL nomawi a awm tih an hria.

MPL club thar hian khelmual pawna Electric Veng mipui an tam hneh theih chuan khelmual chhungah nghawng ṭha a awm thei ang.

I Day Football-a Electric Veng FC champion puitu coach Lalsangzuala Hmar hian Chhinga Veng a enkawl laia I Day Football nomawi vawi hnih a chawi tawh nen a zawnin vawi thum a champion tawh.

MPL-ah ni se Sanga hian a zawnin vawi thum final a lut tawh a, Chanmari FC leh Chhingcows vawi khat ve ve a champion pui. CRS hman hnua MFA-in transfer a hawn leh takah khan Electric Vengin MPL best defender PC Laldinpuia leh Mizoram aiawh kal tawh tho Lalmalsawma (Buanga) te an lalut a, tlar hmaah Vanlallawma an neih belh. An neih sa Jacob Lalrawngbawla, Ramhlunchhunga leh David Lalchhuanawma te nen club tawrhhlelhawm tak an ni dawn.

Sanga chuan, "Kan thawkrim a, veng mipui puihna nen result ṭha tak nena bul ṭan kan duh," a ti. Sanga hian Electric Veng hi a champion pui thei a nih chuan MPL club pathum champion pui thei hmasa ber a ni ang.

FC Venghnuaiin I Day Football-ah champion turin minute 12 chhung goal chhuah loh chauh mamawh tawh mah se goal hnih an chhuah tak si avangin nomawi an en liam. Coach Rindika Hmar leh a hoten a tawp khar pawimawhzia an hre thar ang. 

MPL club thar hian squad tihchak nan MPL top scorer ni tawh Laldampuia, Israel Laldingngheta, PC Zosanga, Malsawmkima (Keeper) leh David Lalchhuanmawia te an lak belh. I Day Football aiin an ṭha tawh zawk - mah se Electric Veng lakah an player tharte hi an la chhawr thei dawn lo.

Rindika Hmar chuan, "Squad pan zawk kan ni chungin, chak loh zawn hi player-te leh veng mipuiten kan duh lo a, theihtawp kan chhuah dawn. Team khawng lo zawk tan chuan thawhrim a ngai a, chu chu kan innghahna a ni," tiin Vanglaini a hrilh a, Electric Veng an hneh theih nan veng mipui puihna a dil bawk.