Guwahati khawpuiah India inlan dawn

FIFA World Cup 2022 qualification - AFC second round-ah India an inlan dawn a, zanin dar 7:30 hian team ṭha Oman an mikhual ang. 

India squad-ah hian Lallianzuala Chhangte chu Mizo awmchhun a ni a, regular player Jeje Lalpekhlua chu a khup zai a la inenkawl mek avangin squad-ah a la tel lo. 

Blue Tigers hi coach thar Igor Stimac hnuaiah an insiamrem mek a, zanin aṭang chuan fan-ten result ṭha an beisei tawh ang. 

India leh Oman inkhel hi Star Sports 3, Star Sports 1 Bangla leh Asianet Plus-ah te live-a pekchhuah a ni dawn a, online-a en duh tan Hotstar leh Jio TV-ah en theih a ni dawn bawk. 

Asian Football Confederation enkawlna hnuaiah ram 47 an awm a, Timor-Leste hrem an ni a, first round-ah team an inthlifim tawh bawk avangin second round-ah chuan team 40 an 

inel dawn. 

Team 40 hi group pariatah, team panga zel awmin ṭhenhran an ni a, group tina pakhatna leh pahnihna zinga a ti ṭha zual pali hian third round an lut ang a, Asian Cup khel turin an tling chiang bawk ang. Group-a pahnihna ni si, pahnihna ti ṭha pali zinga tel pha lo chuan Asian Cup qualifying third round bak an khel dawn lo. 

India hi Group E-ah Bangladesh, Oman, Afghanistan leh Qatar nen an awmho a, Qatar hi World Cup thleng tur an nih avangin tling sa an ni. Qatar hi Group E-ah pakhatna emaw pahnihna ti ṭha pali zingah an tel chuan an hmun ruak hi pahnihna zinga panganain an luah ang. 

Team 12-in AFC World Cup qualifier-ah third round an lut dawn tihna a ni a, third round-ah hian team 12 hi group pahnihah, team paruk ve ve awmin ṭhenhran leh tur a ni. 

Group pahniha a sang pahnih chu World Cup khel turin an tling ang a, pathumna ve vein home & away kalphungin playoff an khel ang. Playoff-a chak zawk team hian inter-confederation playoff an hmachhawn leh ang a, chutah chuan hnehna an chang a nih chuan World Cup khel turin an tling ve leh dawn a ni. 

India group aṭang hian Qatar hi pakhatna nichiang tura beisei an ni a, chumi awmzia chu pahnihna zinga ti ṭha pangana pawhin 'chance' an nei dawn tihna a ni - Blue Tigers hian Qatar an ngam loh pawhin team dang zawng hneh an tum a pawimawh. 

India-in Oman an mikhual dawn a, zawhna awm hmasa chu Oman an ṭha em? tih a ni. Thawnthu hlui keu let India tan a phurawm lo.

Vawi sarih an intawn tawhah Blue Tigers hi vawi khat chiah an la chak ve a, vawi li an tlawm a, vawi hnih an inhnehtawk. Oman hi coach thar Erwin Koeman enkawlna hnuaia khel an ni a, Feyenoord boss hlui hian match thum chiah a la kaihruai chungin an la tlawm lo. 

Player a nih laia Netherlands tana vawi 31 inlan thei Erwin hi Southampton leh Everton-ah Ronald Koeman thachhang dawltu niin assistant coach a lo ni tawh a, 4-2-3-1 emaw 4-4-2 a rawn hman a rinawm. 

Oman tan tlarhmaah Abdul Aziz Al-Muqbali chu innghahna tur a ni dawn a, kum 30 mi striker hi ram tan match 77-a khelha goal 26 khung thei a nih avangin Sandesh Jhingan leh Anas Edathodika ten hna an ngah dawn tihna a ni. 

Ram tana vawi 170 inlan thei, 'Kano' tia hriat lar Ahmed Mubarak Al-Mahaijri hi lam hmaih a harsa bawk. Saudi Arabia leh Qatar lama a career tam zawk hmangtu striker hi kum 34 mi a ni a, a tawnhriat ringawt pawh chhawr 

tham a ni. 

Tlarhnunga Saad Al-Mukhaini hoa Oman defender-te an inremkhawm tur hi paltlang a harsa dawn a, Sunil Chhetri leh Lallianzuala Chhangte ten an khelh ṭhat a pawimawh ang. Midfield-ah Udanta Singh, Anirudh Thapa leh Sahal Abdul Samad te ho chu India tana bul ṭan leh tura beisei an ni a, goalkeeper Gurpreet Singh Sandhu a ṭangkai dawn bawk. 

Croatia tana World Cup-a pathumna dinhmun lo hauh tawh a nih avangin India coach Igor Stimac-a'n tawnhriat a nei ṭha tih phat rual a ni lo a, a pawimawh ber erawh India tana a hman ṭangkai a ni. 

Stimac hian King's Cup leh Intercontinental Cup-ah India a kaihruai tawh a, players leh khelh dan a la enchhin mek avangin result a la nei ṭha tawk lo. Croatian coach enkawlna hnuaiah India hian match nga an khel tawh a, vawi khat chiah an la chak - vawi thum an tlawm a, vawi khat an khingpui an inhnehtawkpui. 

Hetihchhung zawng hian India-in goal 13 an chhuah a, Stimac-a'n a la inzir mek thu a sawi miau avangin dem theih a ni lo. 

Stimac tan inzirthu sawi hun a ni tawh lo a, zanina Guwahati khawpuia fans sing tel pungkhawm pawhin result ṭha an beisei tawh ang. 

Kum 51 mi coach chuan, "Tunah chuan result chiah a pawimawh tawh. India tana ka thil tum pahnih lah ka theihnghilh hek lo.  "Fan-ten football hmuhnawm hmuh an duh a, chak turin min duh bawk," a ti a, Blue Tigers fan-te duhna tih hlawhtlin a tum thu a sawi. Stimac-a duh ang leh fan-te beisei anga khel chhuak turin Indian player-ten theihna an nei em? Zaninah a chhanna pek kan ni dawn e.