Match 100 chak thei Serena

Serena Williams chuan US Open bikah match 100 zet hnehna a chang tling ta. American star hian Thawhlehni zan khan Wang Qiang chu minute 44 chhung leka hnehin semifinal a inhlangkai.

Flushing Meadows, New York-a inkhelah kum 37 mi Serena hian seeded 18-na Qiang lakah zahngaihna a lantir lo. Vawi 25 winners vaw chhuakin a khingpui service ṭum nga a chhuhsak bawk a, nuamsa takin 6-1, 6-0 in hnehna a chang.

Serena hian Grand Slam nomawi 24-na tur a beisei mek a, a match lehpekah chuan Elina Svitolina a hmachhawn leh ang. Svitolina-i'n inkhel dangah Johanna Konta chu 6-4, 6-4 in a lo hneh ve thung a ni. Seeded pariatna Serena chuan, "Match 100 ka chak tling ang tih hi ka ngaihtuah ngai lo. Kuminah ka khel ṭha tawk lo a, beisei angin ka hlawhtling lo bawk. Chuti chung chuan player ṭha tak tak ka hneh ve thei zel hi a lawmawm," tiin a sawi.

Tennis player ropui berte zinga mi Serena hian Open Era chinah chuan major title lak hnem lamah Margaret Court (24 titles) chiah tluk loh a nei. Australian legend hi nih rual theihna hun ṭha vawi thum a nei tawh, mahse final-ah a chak lo vek. Kumin hian an ramah ngei hun ṭha neih leh theih a tum ruh hle.