US Open aṭangin Roger Federer a tla

Roger Federer chu Grigor Dimitrov hneh loin US Open quarterfinal-ah a tla. Swiss star hian a zawna match sarih a hneh theih Bulgarian player hi 3-6, 6-4, 3-6, 6-4, 6-2 in a ngam lo a ni.

Nimin zing Flushing Meadows, New York-a inkhelah Federer hi a tawp lamah a hnungzâng na vangin enkawl lailawk a ngai. World number 3 Federer chuan, "Inkhelh chhung zawng khan a na ka hria, mahse ka khel thei," tiin chhuanlam a siam lo.

Kum 28 mi Dimitrov chuan, "A tawp lamah khan harsatna a nei tih chu ka hria, keichuan ka hun ṭha neih kha bawhpelh loin ka lo chhawr ṭangkai zel mai a ni," a ti. Semifinal-ah Daniil Medvedev a hmachhawn leh ang.

Tun hma deuh 2017 khan Dimitrov hi world number 3 a ni a, a tawn san lai ber a ni - tunah erawh number 78 a ni. Quarterfinal-a a khingpui Federer erawh vawi nga champion tawh a nih bakah, seeded pathumna a nih avangin Roger hi harsa lutuk loa tlang tura ngaih a ni.

Mahse, beisei leh rin ang ngawtin thil a kal bik lo. Arthur Ashe Stadium-ah player pahnih an inkhel tawk hle, game lina an khelh laiin Federer hi 4-2 in a hnufual, break point vawi 12 ngawt inchhanhim zuiin 3-4 a nihpui a, he game bik hi minute 12 chhung zet an khel!

Set hnih ve ve an lak hnuah a chak zawk tur chinfel a ngai. Set hnuhnung berah Federer a chefuh hlei thei lo, a service hloh nghalin a tawp thlengin a tho chhuak tawh lo, darkar thum leh minute 12 an inkhelh chhungin a chak lo zawk, a vawi khat nan Dimitrov lakah a tlawm.

Dimitrov hi player beiseiawm berte zing mi a ni ṭhin, kut khing khatin a backhand thei a, a khelh dan phung leh a ball vuak dan chu Federer nena khaikhin a hlawh ṭhin avangin a hming lemah 'Baby Fed' tih vuahsak a ni hial.

Amaherawhchu, beisei ang em em chuan a thleng sang ta rih lo. Wimbledon (2014) leh Australian Open (2017) te khan semifinal a lut a, New York khawpuiah bik chuan kumin hi quarterfinal a paltlangna hmasa 

ber a ni.

Dimitrov chuan, "Player thar ka ni ta tihna a ni lo, tun hma lama Grigor kha ka la ni reng. Chutih rualin player thar ang maiin ka khel chhuak a, tuna ka hun tawn hi a nuamin beiseinain ka khat mek," tiin a sawi.

Semifinal-ah Dimitrov hian Daniil Medvedev a hmachhawn leh dawn. Russian tlangval Medvedev hi tun hnai mipa tennis player 'hot' berte zinga mi a ni mek a, season tawpa khelh tur ATP Finals atana in vaw tling hlim 

a ni bawk.

Thawhlehni zan last 16 inkhelah Novak Djokovic hnehtu Stan Wawrinka chu Medvedev hian 7-6 (8-6), 6-3, 3-6, 6-1 in a lo hneh ve thung a ni. August thlaa Cincinnati Masters champion hian tun hnai a match hnuhnung 22-ah vawi hnih chiah chak loh a nei.

Kum 23 mi Medvedev chuan, "Semifinal atan ka inpeih. Quarterfinal khelh hma pawh khan ka malpui hliam kha chu a dam tawh," a ti. A dam thu sawi mah se Wawrinka nen an inhmachhawn lai hian set khatna khelh laiin a malpui hliam enkawlsak a ngai hial.