Marquez-a'n contract pawtsei

MotoGP champion lai Marc Marquez chuan Repsol Honda tan a rinawmzia lantir nan kum li daih contract a ziak thar a, a team ngai tan hian 2024 season thleng bike a khalh chhunzawm dawn tihna a ni

Spain tlangval Marquez hian Honda bike khalh chungin bike intlansiakna sang berah hian vawi 56 hnehna a chang tawh a, rider championship-ah pawh ṭum ruk ngawt a champion tawh.

Kum 27 tling hlim Marquez chuan, "Honda hian 2013 khan MotoGP bike khalh theihna hun ṭha min siamsak, a season hmasa bera hlawhtlinna kan chan aṭanga tun thleng hian hun hlimawm leh nuam lam hlir a ni," tiin a sawi.

Honda Racing Corporation (HRC) president Yoshishige Nomura chuan, "Rider leh team lam chuan beiseina sang tak nen hmalam pan zel kan duh, kan duhna chu a taka lantir nan contract kan ziak," a ti.

Marquez hi rider hmuhnawm leh ṭha bera ngaih a ni mek a, tun hnaiah amah elphak an awm meuh lo. Season hmasa lama a chetsual vangin a darah hliam a neih chu nikum November thla khan zai niin tunah chuan a dam tawh.

Bike intlansiakna sang ber inbuatsaihna hnuhnung atan February 22-24 hian Qatar-ah an tlan ang, inelna tak erawh March 8 hian a hmasa ber atan Losail Circuit-ah an tlan ang.