Vawiin tlai dar 4-ah MPL7 Final Rematch

Mizoram Premier League Season 8-na round hmasa berah MPL7 finalist Aizawl FC leh Chhinga Veng FC te vawiin tlai dar 4:00 hian Lammualah an inkhel dawn. AFC hi season liam ta I League-a an coach Standly Rozario-a'n a enkawl chhunzawm avangin inelna an la thutak tih a chiang a, coach Lalsangzuala Hmar kalsan Chhinga Veng tan fiahna a ni ang.

Nikum December 17 zan khan Lammualah league round hmahruaitu Chhinga Veng leh Aizawl FC an inhmachhawn a, Chhingcows hi champion lai an nih bakah MFA Super Cup leh I Day Football an humhim vek avangin champion rinkai an ni.

Amaherawhchu I League club tan Alfred Kemah Jaryan chu danglamna a ni a, Liberian midfielder hian minute 39-naah goal a khung. Chhinga Veng champion nawn beiseina chhawm nung turin Lalromawia'n minute 73-naah a chhang let a, extra time thlengin goal a luh belh tawh lo.

AFC tan Paul Ramfangzauva'n pet goal lo mah se Chhinga Veng midfielder Lalrinchhana'n a pet goal bik lo. Vawi nga pet zawhah 4-4 a ni a, sudden death-ah Chhingcows wing back Hmingthanmawia'n a hlah a, AFC tan Lalrinchhana Tochhawng-in chakna goal a khung. 

Aizawl FC vawi thum champion hmasa ber an ni a, Chhingcows erawh a zawna champion an beiseina a thamral. Chhinga Veng rilru natna belhchhah turin penalty hlahtu Rinchhana'n I League khel turin Aizawl FC a zawm zui bawk.

Chhinga Veng coach Lalsangzuala Hmar-in Electric Veng a zawm rualin Chhingcows ngai kan hmu tawh dawn lo tih a hriat nghal a, Chanmari FC an rawn ṭan thar bawk avangin player ṭha an chan nual. Tun season-ah coach Lalremruata leh Anand Gurung te hoin bul an ṭan ṭha dawn a, MPL hi fiahna tak tak tur a ni.

I Day Football-ah Chhinga Vengin semifinal an lut a, an coach hlui Sanga enkawl Electric Veng lakah 1-0 in an chak lo. Amaherawhchu khelmuala an chet dan thlir chuan MPL8 semifinal beisei tur zinga mi an ni a; player che rang leh hmuhnawm Lalchungnunga (Mizo Messi tia hriat lar), Lalsawmzela leh Lalnuntluanga te an awm. Rawlthar ṭha tak tak thlawp turin K. Lalnunzama (Valtea), MC Malsawmzuala leh Vanlalzuidika te an awm avangin an tlo viau tura ngaih a ni.

Aizawl FC-in MFA Super Cup an khel lo a, I Day Football-ah Super Cup champion Mizoram Police 5-1 in an sawp nghal. Amaherawhchu Standly Rozario hote an che ṭha zui lo a, Electric Veng nen an inhnehtawk hnuah Chanmari FC lakah 3-1 in an chak lo. Heti chung hian semifinal an lut tho a, MPL kaithar FC Venghnuai chu penalty-ah an hneh lo.

I League club hian MPL best player ni lai Alfred bakah defender Juuko Richard Kassaga an chelh a, position tinah tawnhriat nei an kawl vek thei a. En châkawm lai erawh academy aṭanga senior-a an sawn chhoh David Lalhlansanga, PC Lalhriatpuia leh Ayush Dev Chhetri te hi eng ang chiahin nge an ṭhat ang tih lai hi a ni.