Semifinal-ah Bencic a lut

Belinda Bencic chuan Donna Vekic chu 7-6 (7/5), 6-3 a hnehin US Open semifinal a lut a, Swiss nula hian Grand Slam bikah a vawi khat nan quarterfinal a paltlang ve ta a ni.

Nilaini zan inkhelah Bencic a khel ṭha viau, darkar khat leh minute 41 an inkhelh chhungin a khingpui service vawi thum a chhuhsak thei a, a service vawi khat hloh ve mah se a dai ngai loh ram dai turin a tlang ta tho.

Semifinal-ah chuan seeded 15-na Bianca Andreescu nen an inhmachhawn leh ang. Tun inelna a hman ṭhat avang hian June 2016 hnua a vawi khat nan ranking chhuak tharah a sang 10 zingah a tel ve leh tawh dawn a ni.

Junior huanga world number 1 ni ṭhin Bencic chuan, "Ka naupan lai khan Grand Slam tournament-a thlen san hi ka châk ṭhin a, tunah chuan a takin a thleng chho mek," tiin a sawi. 2014 US Open-ah khan quarterfinal a lut tawh a, a hnu lamah a thleng sang zui ngai ta lo.

Nimin zing khan quarterfinal match khat dang khelh niin, kum 19 mi chauh Bianca Andreescu chuan Elise Mertens chu 3-6, 6-2, 6-3 a hnehin semifinal a inhlangkai ve bawk. Kum 2009 hnu lamah Andreescu hi hmeichhe singles player kum 20 hnuai lam US Open semifinal lut leh thei hmasa ber a ni. Seeded 15-na Andreescu chuan, "Ka mumang ni loin a tak ngei chu a ni si, season hmasa mai kha chuan he hmunah hian qualifier ka khel ve chauh kha a ni," tiin a sawi.