Mama hnuaiah Chanmari FC-in bul ṭan dawn

Zanin dar 7:30 hian Chanmari FC-in S. Malsawmtluanga kaihhruaina hnuaia Mizoram Premier League match hmasa ber an khel dawn a, Ramhlun North nen an inhmachhawn dawn.

Chanmari FC hian Mama kaihhruaina hnuaiah MFA Super Cup final an lut nghal a, amaherawhchu Mizoram Police nen goal awm loa an inhnehtawk hnuah penalty shootout-ah 5-4 in an chak lo. MPL-a vawi hnih champion tawh Chanmari hian I Day Football group stage an patlang lo a, chutihrualin semifinal an thlen lohna erawh point ni loin goal khat chauh a ni.

Mizo football legend tiha sawi Mama thlen chin hi a ṭha thawkhat viau a, mahse coach ṭha a ni em tih tehna tur chu MPL a ni ang. Chanmari hi CYMA Football inelnaah an champion avangin an veng mipui an phur thar a, season ṭan hma pawhin Kolasib-ah tour neiin khawtual club Project Veng FC chu 3-1 in an hneh.

Chanmari hian goal kung turin MS Dawngliana leh Lalnunzama te an kawl a, tun season-ah champion tumin player ṭha tak tak an lak khawm avangin team hmuhnawm tura ngaih an ni. An khingpui tur Ramhlun North erawh team nem tur zinga dah an ni a, mahse Ramhlun North hian I Day Football-ah Chhinga Veng leh Chawnpui an draw ve ve a, an chak lohna chhun FC Venghnuai lakah pawh goal khat chiaha an chak loh avangin pal zam ngawt a rem lo ang.