Hriatthiam har Mizoram Police

Vawiin tlai dar 2:30 hian Mizoram Police chuan MPL8-a an match hmasa berah Chawnpui FC an hmachhawn dawn. 

Police hian season liam ta khan semifinal an thleng pha a, final thleng lo mah se an player lakluh tharte nen training mumal an neih theih loh avangin an thlen chin hi a pawm theih. Kuminah erawh season ṭantirh aṭangin Police player an kim tawh a, MFA Super Cup-ah champion nghalin 2012 I Day Football hnua a vawi khat nan nomawi an chawi. Amaherawhchu, Police team hian I Day Football-ah Aizawl FC lakah 5-1 zetin an tlawm a, group stage-ah an tla.

Lalbiaksanga Colney kaihhruai Police-in a vawi khat nan MPL nomawi chawi ngei an tum dawn. Police hian MFA Super Cup-ah Chawnpui FC hi 6-1 a an sawp tawh avangin match hmasa berah point thum an hmu lo a nih chuan an lawm lo ang. 

Chutihrualin Chawnpui FC hi MPL hmasa bera Dinthar FC champion puitu HC Zarzoliana'n a enkawl a, MFA Super Cup-ah pawh hian player kima an khelh laiin Chawnpui hi 1-0 in hma an hruai. Police hi chak tura ngaih ni mah se point thum erawh a chiang lo.