Sony Liv-ah Mizoram Premier League

Mizoram Premier League Season 8 chu Sony Liv-a tihchhuah a ni dawn a, internet awmnaah chuan khawi hmun aṭang pawhin a en theih dawn tihna a ni. He thilah hian Mizoram Football Association leh a thawhpui Zonet Cable TV Pvt. Ltd-te leh  Sony an thawkho dawn a ni.

He thawhhona a puitlin theihna tura kawng sialtu chu World1 Sports Consulting Pvt. Ltd an ni a, anni hi sports management firm niin an thawhrimna zarah Mizo tlangvalte inkhel khawvel hmuh theihah Sony Liv kal tlangin pholan 

a ni dawn.

MPL atana MFA partner Zonet Cable TV Pvt Ltd leh Sony lam chuan September 4 khan thawhhona hi an tifel a, MPL8 inkhel ṭhenkhatte Sony Liv OTT  kal tlangin a en theih ang. Sony Pictures Networks India Pvt hnuaiah hian peng hrang hrang a awm a, Sony Liv hi an  internet television channel a ni. Sony Liv OTT (over the top media - internet kal tlang a en theihna a ni ber ang) website leh applications kal tlangin MPL8 hi en theih tura beisei a ni.

Sony Liv hian thlà tin thlirtu maktaduai 25 vel a nei thin a, hei vang hian MPL hlutna pawh nasa takin a belhchhah ngeiin a rinawm. Sony Liv kaltlangin internet hmanga zau zawka MPL en theihna a awm dâwn ta a, mobile phone atang pawha en theih turin MPL inkhel ṭhenkhatte tihchhuah ṭhin a ni ang.