Pool E pakhatna Mizoram

Basketball Federation of India buatsaih 46th Sub Junior National Basketball Championship 2019-ah Mizoram chuan Goa 89-1 a an sawp hnuin September 4 khan Delhi 58-18 in an hneh leh a, group E pakhatna an ni.

Pool E-ah hian Tripura an inlan loh avangin Mizoram hi pakhatna an ni a, tukin zing dar 7:45 hian Telangana, Gujarat, Manipur leh Uttarakhand an awmna a pool D pakhatna nen an inkhel ang. Mizoram hian Delhi an hmachhawn ṭum hian match hmasa bera khel thei lo, Johan Lalthianghlima leh Lallianmawia te an chhawr thei tawh. Player pahnih hian hmun pawimawh an chang nghal a, match hmasa bera khel ṭha Easter Malsawmtluanga a khel ṭha nawn bawk.

Mizoram coach Marc L. Sailo chuan, "Level 1 kan kai lohna a rei tawh em a kai ngei kan tum,  chu mi tur chuan theih tawp kan chhuah ang. Mizo mipui te ṭawngṭainaah min lo hre turin kan ngen e," tiin Vanglaini a hrilh. Mizoram hian Level 1 kai turin pool D pakhatna an hneh hnuah pool C leh F winner inkhela chak zawk an hneh leh a ngai dawn a ni.