Dawhtheihna neih leh mahni inven a ngai - Sindhu

Nikum August thla khan PV Sindhu-i'n Badminton World Championships nomawi a chawi a, a hnu lamah erawh hlawhtlinna lian a chang thei tawh lo - nipuiah Tokyo Olympic neih a nih dawn avangin Sindhu tan insiamṭhat a ngai tawh hle.

Rio Olympic-ah khan Sindhu hian final lutin a hun laia world number 1 Carolina Marin a ngam loh avangin silver medal a dawng, kuminah beisei a nei sang; chutih rualin a tan hna a hautak dawn hle.

Kum 24 mi Sindhu chuan, "Season khat deuhthaw chu tluk leh din fawmin ka kal ta, ke chheh a dik hleih theih loh chuan a hrehawm duh hle. Tunah chuan March thlaa neih tur All England Championship atan ka inbuatsaih ngawrh hle.

"Birmingham-a inelna kan neih hunah chuan ṭha taka ka inkhelh theih ngei ka beisei. Premier Badminton League pawh khan fitness lamah kawng hrang hrangin min pui nasa hle a ni," tiin a sawi.

Indian shuttler chuan sawi zawmin, "Ka hmuh dan chuan Olympic khel tur player 15 chu an ṭha tawk vek, tu pawhin hlawhtlinna chang thei an ni. Kei pawhin beiseina ka nei thei, amaherawhchu hlawhtlinna chang tur chuan dawhtheihna ka neih tam a ngai.

"Ho lam taka khing-puite point pek loh a ngai bawk, chumi tur chuan khingpui nawr bakah mahni inven dan ka ngaihtuah tel a ngai bawk. Tokyo atan player tin an thawhrim avangin kei pawh ka thawkrim zel ang," a ti.