Dan rual loh Rafael Nadal

Tennis player langsar ṭhenkhat ten beisei an phak lohna US Open-ah Rafael Nadal a dingnghet tlat a, nimin zing khan Diego Schwartzman hnehin semifinal a inhlangkai. Grand Slam nomawi 19-na chawi turin match hnih chauh chak a hmabak ta.

Flushing Meadows, New York-a inkhelah Nadal-a'n set hmasa pahnihah a service hloh ve ve mah se huaisen takin a chhuhsak let thei a, darkar hnih leh minute 47 an inkhelh hnuah 6-4, 7-5, 6-2 in a chak. Nadal hian semifinal-ah Matteo Berrettini a hmachhawn leh ang.

Semifinal lehlamah Grigor Dimitrov leh Daniil Medvedev te an inhmachhawn dawn a, player la dam pali zingah Nadal chiah hi Grand Slam final khel tawh a ni. A dang pathum tan dai ngai loh ram a ni dawn - Spanish tlangval tan 'chance' a ṭha hle.

Inkhel en lo a point score chauh en chuan Nadal hi awlsam taka chakah an ngai ngei ang. Mahse, New York khawpuia thil thlen dan chu a dang daih. Set hmasa berah Nadal-a'n bul ṭan fuhin 4-0 in a hma a hruai, amaherawhchu Argentine tlangval hian 4-4 a nihrual pui hnuah a vanduai zui hlauh.

Set hnihnaah pawh Nadal bawk che fuh hmasa lehin 5-1 ngawtin a sang fal leh thei. Dinhmun chhe taka a din hnuah 5ft 7in-a sang Schwartzman a zam lo, fans lamin amah au phur nan 'Olé, Olé, Olé' an tih dual dual karah 5-5 a nihrual pui leh bawk. Mahse, a vannei zui lo a, set thumnaah player ṭha zawk Nadal dan theih a ni lo.

Spanish tlangval Nadal chuan, "A khelh fuh laklawh lai chuan dan theih a ni lo, tihsual ka neih a piang kha a rawn hmang ṭangkai hmiah hmiah zel mai a ni," tiin a vawi 33 nana Grand Slam semifinal awlsam taka lut a nih loh thu a sawi.

Quarterfinal inkhel dangah Matteo Berrettini-a'n darkar thum leh minute 57 chhungin Gael Monfils chu 3-6, 6-3, 6-2, 3-6, 7-6 (7-5) in a hneh. Italian tlangval hian US Open vawi thum champion tawh Nadal a hmachhawn leh dawn avangin a kalkawng a hautak chhunzawm zel dawn.

Seeded 24-na Berrettini chuan, "Tennis ka khelh tawh zinga ka khelh ṭhat ber ṭum a ni ang. Point zawng zawng ka hmuh dan pawh kha ka hre tawh lo, match point chiah kha rilruah a awm tawh," a ti. A vawi khat nana Grand Slam quarterfinal a paltlang hnuah court chhungah a mu a, lawm avangin sawi tur a haihchham hial.

May thla tawp khan Berrettini hi world number 100 pawh a ni phak lo, karleha ranking tharah erawh a sang 20 zingah a tel phak tawh ang. Semifinal chungchang zawhna changin Italian player chuan, "Nadal nen hian kan la inhmachhawn ngai lo, huaisen taka khel ṭhin a ni tih chu ka hria. 5-0 emaw, 40-Love a nih pawhin a beidawng ngai lo," a ti.

Nadal hian French Open nomawi a lak chiah khan Grand Slam title 18 a nei tling tawh a, major title lak hnem lama a tluk loh awmchhun chu vawi 20 champion tawh Federer chiah a ni. Tun ṭumah hian a champion a nih chuan Swiss star nen an inkarah nomawi pakhat chiah a awm tawh ang.

'Big Three' zingah Federer leh Novak Djokovic ten semifinal an thleng zo lo, tuna player la dam pali zingah chuan Nadal hi champion tura rinkai ber a ni. Seeded pangana Daniil Medvedev hi a tlang a nih chuan amah nek buai thei ber tura ngaih a ni.

Season kal laiah Nadal a khel ṭha tluang a, 2008 hnua a vawi khat nan inelna lian pali - Australian Open, French Open, Wimbledon leh US Open-ah te semifinal a thleng leh vek; Flushing Meadows-ah hian a vawi li nan a champion a nih pawhin a mak lo ang.