Premier League a ngaihnawm dawn Chelsea vs Spurs; Leicester vs City

Khawvela football league ngaihven hlawh bera chhal ngam Premier League-ah inkhel hmuhnawm chhawpsak kan ni leh dawn ta. 

Zanin dar 6:00-ah London derby kan hmu dawn a, Chelsea chuan Champions League khel tura an elpui Tottenham an mikhual dawn a, inkhel boruak a 'hot' loh ring suh. 

Chelsea leh Spurs tan kar duhawm a ni lo a, insiamṭhatna remchang an neiha an 'intawng' kher tur hi pawi an ti ve ve ang - an match hnuhnung berah an chak lo ve ve.

Leicester City-in zan dar 11:00-ah Manchester City an mikhual dawn thung a, City hi UEFA hremna chungchanga team boruak a hnual lai a nih avangin Foxes tan zanin hi hun ṭha a ni. 

Kum 2014 khan Frank Lampard chuan Manchester City a zawm a, hetihlaia Chelsea boss Jose Mourinho chuan, "Kan elpui ber team-ah a kal a, kan hmangaih thawnthu pawh a tawp ve nghal a ni," tiin Lampard-a thutlukna a sawisel. 

Mourinho hian Chelsea a enkawl hnuah an elpui Manchester United a zawm a, tunah Spurs coach a ni leh ta. Chelsea hmelma a zawmtirh hian Spurs a enkawl ngai loh tur thu a lo sawi tawh chungchang zawh let a ni. 

Portuguese manager hian thiam takin, "Kha thu ka sawi lai kha chuan Chelsea-in min la ban lo," tiin a sawi a, amah bantu Blues thiam loh a nih thu a sawi. 

Chelsea vanglai sawi apianga Mourinho hnuaia Lampard, John Terry leh Didier Drogba-te mitthla ṭhin tan chuan hriatthiam har a ni a, zaninah Stamford Bridge-in Mou a lawm dawn lo. 

Spurs talbuai vanglai a ni a, Chelsea an talbuai lo bik lo - match 26 ve ve an khelh tawhah point khat chauhin an inthlau. Chelsea hi palina an ni a, an hnuai chiahah Tottenham an awm. 

Mourinho-a'n Spurs a enkawl tirh khan table-ah 14-na an ni a, tunah chuan Champions League an sawi ri ta - Chelsea an hneh chuan palina an ni ang a, European football an mitthla nghal ang. 

Mahse, he team hian inhliam Harry Kane leh Son Heung-min tel loin beisei an phak lo a, Champions League last 16-ah RB Leipzig an ngam lo - Mourinho-a'n a naute na takin a sawisel zui. 

Mahse, hei hi Mourinho 'tactic' a ni. John Terry chuan, "Thinrim takin min hau a, keimahnia a ṭha ber phawrhchhuah a tum vang lek a ni reng si," tiin Mou-a kalphung a lo sawi tawh a, zaninah Spurs player-te theihna sang ber kan hmuh leh hmuh loh a hriat ang. 

Blues-in an league match hnuhnung berah Manchester United chu 2-0 in an ngam lo a, VAR chungchangah sawi zui a tam avangin Blues fan-te chuan referee duhsakna dawng loah an inngai ang. 

Red Devils laka inlan thei lo zingah Christian Pulisic leh Callum Hudson-Odoi an inlan theih loh chhunzawm dawn a, United laka inhliam N’Golo Kante inlan a rinawm loh zawk bawk. 

Lampard chuan, "A inlan thei mai thei," tiin United laka inlan lo Tammy Abraham chungchang a sawi a, English striker hi a inlan thei a nih chuan Spurs tlarhnung tan hna a hautak sawt ang. 

Kum 22 mi striker hian tun season-ah goal 15 lai a khung tawh a, Abraham tel lo chuan Blues tlarhma an hriam tawk ṭhin lo. 

Premier League pahnihna Manchester City leh pathumna Foxes inkara point awm chu point li chauh a ni a, Brendan Rodgers-a nauten league-a pahnihna nichunga season khar an chak em em ang. 

UEFA-in season hnih ngawt European football khel thei lo tura a hrem City-in hrem an nihna khin let an tum a, hetiang boruak karah hian result ṭha neih zel an duh. 

Foxes tan Wolves laka hrem Hamza Choudhury a inlan thei dawn lo a, he thu buatsaih lai hian an match hnuhnung pahnih khel lo tawh Wilfred Ndidi inlan theih dawn leh dawn loh a chiang lo. 

Nilaini zanah West Ham hnehtu City an chau ang tih a chiang a, Pep Guardiola chu squad siksawi tura beisei a ni - David Silva leh Raheem Sterling chu inlan thei lo chiang tur an ni ang.