Aizawl FC leh Chhinga Veng an intiat

Nizan khan MPL7 final rematch khelh a ni a, Chhinga Veng leh Aizawl FC chu 2-2 in an inhnehtawk.

I League club hian Lalramhmunmawia (Te-a) hmangin injury time minute linaah si phurh an sut a, hun a tawp nghal - point khat ve ve an insem. Ruah a sur nasat avangin inkhel hi a hun takah ṭan theih a ni lo a, Lammual chhunga tui a tlin tam bakah a chhehvelah a luang nasa a, dressing room thlengin harsatna a thlen.

Inkhel an ṭan a, Aizawl FC-in minute 27-naah Isak Vanlalruatfela goal hmangin hma an hruai a, Thingsultliah tlangval hian box pawn aṭangin a khung mawi hle. Chhinga Vengin MC Malsawmzuala penalty hmangin first half-ah vek an si phurh an sut a, Siaha tlangval MC-a hian freekick aṭangin minute 68-naah hmahruaina goal a khung leh bawk.

Lalremruata leh Anand Gurung-te enkawl Chhingcows hi chak thei dinhmuna an din tawh hnuah injury time-ah thil danglam a thleng - Aizawl FC left back Te-a'n ṭha zeta tauh goal-in hun a tawp zui nghal.

Season liam ta, MPL7-ah khan Chhingcows hian league round-a pakhatna ni chungin knockout stage an thleng a, Lalsangzuala Hmar hoin final-ah Aizawl FC an hneh lo. Tun season-ah Sanga leh player ṭha ṭhenkhat chhuak mah se

Chhinga Veng an la ṭha reng tih a chiang a, I League-a tawnhriat nei ṭha Standly Rozario enkawl Aizawl FC nen an inhnehtawk. Aizawl FC-in an foreigner pahnih Richard Kassaga leh Alfred Kemah Jaryan an chhawr tluan a, team innghahna an tling. Chhingcows pawhin Ivorian forward Quattara Sie chu injury time-ah an luhtir a, a theihna lantirna hun a nei lo. 

MPL8 match hmasa pathumah Mizoram Police chiah an chak a, semifinal lut tura rinkai dang Aizawl FC, Chhinga Veng FC, Electric Veng FC leh FC Venghnuai-te an inhnehtawk vek avangin tun season knockout stage lut tur hriatthiam har dawn hle.