Serena hmaa ding tur Andreescu

US Open hmeichhe singles final khelh tur a hriat. Inrinni zan dar 1:30 hian Arthur Ashe Stadium-ah Serena Williams leh Bianca Andreescu te an inhmachhawn ang - a tu zawk pawh hi chak se tennis chanchin ziah danglam a ni dawn.

American nula Serena hian hnehna a chang a nih chuan Open Era china Grand Slam la hnem ber a ni dawn; Australian legend Margaret Court-i record nih rualin major title 24-na a la thei dawn tihna a ni.

Kum 19 mi Andreescu tan Grand Slam final hmasa ber a ni thung dawn a, 2009 hnu lama kum 20 hnuai lam US Open final lut leh thei hmasa ber hian Naomi Osaka hnung zui tumin, season hmasa ang khan New York khawpuiah a vawi khat nan nomawi a beisei thung.

Ningani zan khan semifinal hmasa zawk khelh a ni a, kum 37 mi Serena chuan seeded pangana Elina Svitolina chu 6-3, 6-1 in a hneh. Grand Slam vawi 23 champion tawh hian 2017 September thla a fa a neih hnuah nomawi lian chawi leh theihna tur hun ṭha a nei mek.

Nimin zing inkhelah Andreescu chuan tun inelna bika player sawi hlawh Belinda Bencic chu 7-6 (7-3), 7-5 in a hneh. Andreescu hian US Open main draw a vawi khat khelhnaah final a thleng nghal a, major tournament hrim hrim hi vawi li a khelhna chauh a ni.

September 26 hian Serena-i'n a kum 38 tlin a lawm tawh dawn a, New York khawpuiah hian 1999 khan nomawi a lo chawi daih tawh. US Open title a lak hmasak ber aṭanga thla kua a liam hnuah kumina a khingpui tur Andreescu hi a piang ve chauh!

An tawnhriat leh sulhnu en mai chuan Serena Williams hi chak zawk tura ngaih a ni, mahse tennis court chhunga inkhel a zawh hma loh chuan sawi lawk theih erawh a ni lo. Fa a neih hnua Grand Slam final vawi thum lut tawhin a la hlawhtling lo vek.

Serena chuan, "Nuamti taka khelh tawp mai ka duh, record leh thildang chu ngaihtuah buai loh a fuh zawk," a ti. Nikum final khan rinkai zawk nichungin Osaka a ngam lo a, ṭul lo taka pressure insiam chawp a tum lo. Seeded 15-na Andreescu chuan, "US Open final-a Serena nena inkhelh chu ka naupan laia ka duhthusam ṭhin kha a ni. Semifinal ka paltlang mai pawh kha ka tan chuan a mak tawh, tun hma lama TV aṭanga a inkhel hmuhnawm ti taka ka en ṭhin nen nomawi kan inchuh dawn a ni," a ti.