MPL8-a chak hmasa ber Police

Mizoram Police-in nimin tlai khan Chawnpui FC 2-1 in an hneh a, Mizoram Premier League Season 8-a chak hmasa ber niin champion rinkai an nihzia an nemnghet.

Police tan hian F. Lalrinpuia leh Lalhmunmawia ten first half-ah goal an khung a, Chawnpuiin minute 74-naah C. Lalremruata hmangin siphurh sut ṭhen mah se chak phu zawkin hnehna an chang. Police defender Ahmuntea hi man of the match-ah thlan ni a, MPL8 match hmasa pahnihah Hualngohmun tlangval ve vein chawimawina an dawng.

I Day Football-ah Police hian 6-1 in Chawnpui hi an sawp a, MPL-ah erawh HC Zarzoliana hote an ṭang thei lo. Goal khungtu Aruata'n a chance ṭha neih khung phei se chuan point hlawh chhuak thei hial an ni. Chutihrualin Police midfielder R. Malsawmtluanga'n penalty a hlah a, Valpuia goal khung offside vanga pawm a nih loh bawk avangin Lalbiaksanga Colney hoten point thum hlawhchhuah an phu.

Police hian September 12-ah MFA Super Cup final-a an hneh Chanmari FC an hmachhawn ang a, September 13-ah Chawnpui FC-in Ramhlun North an hmachhawn dawn. Coach Zara hote tan round 2-na inkhel hi a pawimawh ang.