Best FIFA Football Awards

Ningani zan khan FIFA FIFPro Men's World11 a tel thei tur hming 55 chhawpchhuah a ni a, kum 10 chhunga a vawi khat nan Premier League chu player thawh hnem ber an ni.

Player hming puanchhuah 55 zinga 21 chu Premier League player an ni a, English top flight football club zingah Manchester City leh Liverpool chuan player pasarih ve ve an thawh. Club mala lakin Barcelona aia player thawh hnem an la awm lo cheu a, Spanish champion hian player pakua ngawt an thawh. Real Madrid-in dawtin player pariat an thawh thung. 

Spanish La Liga hian Barca leh Real zarzoin kum kua zet chu FIFPro Men's World11 nominee 55 zingah an thawh hnem ber ziah a, kuminah Premier League hian a rawn khum ta a ni. 

September 23-ah Best FIFA Football Awards sem a ni dawn a, hemi rual hian FIFA FIFPro Men's World11 a tel te chu Milan khawpuiah Awards semnaah puanchhuah an ni ve nghal bawk ang. 

FIFPro Men's World11-ah hian goalkeeper pakhat, defender pali, midfielder pathum leh forward pathum thlanchhuah an ni dawn a, rin dan thiam a la harsa rih hle. Player-te hi July 2018 - July 2019 inkara an khelh dan aṭanga teh an ni a, khawvela football khelh hmanga eizawng FIFPro hnuaia professional players 23,000-in vote hi an thlak a ni. 

Juventus forward Cristiano Ronaldo chu FIFPro World11 vawi 15 thlan a nih tawha nominee-a la lang kim vek awmchhun a ni a, World11-a a lan pawh 12 a tling!

FIFA FIFPro Men's World11 shortlist-ah a vawi khat nana lang player 17 an awm a, chung zinga pali  Alisson, Trent Alexander-Arnold, Andrew Robertson leh Roberto Firmino-te chu Liverpool tan an khel.

Player 13 dang a vawi khat nana langte hi Alex Sandro, Arthur Melo, Aymeric Laporte, Bernardo Silva, Christian Eriksen, Dusan Tadic, Ederson Moraes, Frenkie de Jong, Heung-Min Son, Joao Cancelo, Kalidou  Koulibaly, Matthijs de Ligt  leh Raheem Sterling te an ni. 

Kum 15 chhunga a vawi khat nan World11 shortlist-ah Gianluigi Buffon a lang lo a, World11 taka a lan erawh vawi thum chiah a ni thung. Japan lama a pem hnuah kum 12 hnua a vawi khat nan  Andres Iniesta a lang lo bawk. 

Nikuma shortlist-a lang, kumina lang phak ta lo hi 17 an awm a, Edinson Cavani, Thibaut Courtois, Philippe Coutinho, Paulo Dybala, Mats Hummels, Isco, Dejan Lovren, Romelo Lukaku, Mario Mandzukic, Nemanja Matic, Yerry Mina, Keylor Navas, Benjamin Pavard, David Silva, Kieran Trippier, Samuel Umtiti leh Sime Vrsaljko te an ni. 

Brazil chu ram ang zawnga player thawh hnem ber an ni a, Brazil tui liak hi player 10 ngawt an tel. France chu pahnihna niin player pasarih an thawh a, Spain-in paruk an thawh thung. 

Spurs forward Heung-Min Son chu World11 atana player 55 hming chhawpchhuah zinga Asian player tel hmasa ber a ni a, South Korean forward hming a lar zel. Danish player zingah Christian Eriksen chu a lang hmasa ber a ni a, Scottish player zinga lang hmasa ber chu Liverpool left back Andrew Robertson a ni thung.  

Sergio Aguero chu 2016 hnua a vawi khat nan a lang a,  Atletico Madrid goalkeeper Jan Oblak chu nikum a awl zauh hnuin a hming hmuh tur a awm ve leh ta bawk. 

FIFA chuan Best FIFA Men’s Player & Coach, Best FIFA Women’s Player & Coach, Best FIFA Men's & Women's Goalkeeper, FIFA Puskás Award, FIFA Fan Award leh FIFA Fair Play Award for 2019 chu September 23-ah hian an sem dawn bawk. 

FIFA FIFPro Women's World11 chu a vawi khat nana semchhuah tur a ni a, Nilaini khan hmeichhe lam bik hi chu shortlist puan a lo ni tawh. FIFPro hian Women's World11 hrim hrim hi chu vawi thum a lo thlang tawh a, FIFA nena ṭangduna an vawi khat thlanna tur a ni thung.