World champion hmaah Albania

Euro 2020 Qualifier group H-ah world champion France-in Turkey leh Iceland an awmpui avangin tlang a awlsam dawn lo tih a chiang - team pathum hian match li an khelhah point kua ṭheuh an nei. Les Bleus hi Turkey lakah 2-1 in an tlawm tawh.

Zanin dar 12:15-a Didier Deschamps-a hote hmachhawn tur Albania pawh team ṭha an ni a, world champion hi chak chiangsaa dah ngawt theih an ni bik lo. Manchester United midfielder Paul Pogba inhliam vangin Arsenal midfielder Matteo Guendouzi koh a ni a, N'Golo Kante leh Tanguy Ndombele an inhliam bawk. 

Kylian Mbappe inhliam vangin Lille player Jonathan Ikone tan kawng a inhawng a, tlarhmaah Olivier Giroud leh Antoine Griezmann an inthlawp a rinawm.