Spain chhantu Chelsea keeper
Spain-in Ningani zan khan Euro 2020 qualifier-ah Romania an hmachhawn a, Bucharest-ah La Roja coach Roberto Moreno chuan Manchester United keeper David de Gea aiah Kepa Arrizabalaga thlangin a tisual lo. Chelsea keeper hian George Puscas goal khung tur ṭha takin a dang a, Spain-in 2-1 a hnehna changin Romania-a an vawi khat chakna a ni.
Group F-ah Spain-in match nga khelhah point 15 an hmu. Sweden-in harsatna nei loin Faroe Islands chu 4-0 in an sawp a, match nga khelhah point 10 an hmu ve bawk.
Hei le Spain
Spain-in minute 29-na lekah Sergio Ramos-a penalty hmangin goal hmahruai an khung a, Borussia Dortmund forward Paco Alcacer chuan minute 47-naah a chhunzawm ve leh bawk.
Romania beidawn an tum bik lo. Brighton forward Florin Andone chuan minute 59-naah si phurh a rawn sut ṭhen a, beiseina an nei thar. Mahse, minute 79-naah defender Diego Llorente hnawhchhuah a ni chungin Romania-in goal dang an nei thei tawh lo a, player 10 ni chungin Spain an chak. Chelsea goalkeeper Kepa Arrizabalaga chuan George Puscas ball tauh chu hnai set sawt aṭangin a dang.
Kum 33 mi defender Sergio Ramos chu Spain tan player langsar a la nei zel a, Romania lakah pawh khelmual chhung leh pawnah a langsar. Ramos hian penalty a khung hnuah a kut pahnih chu a mit bulah dahin, tarmit lem a siam a, referee chuan Romanian fan-te a tih elah ngaiin yellow card a pe.
Mahse, Real Madrid defender chuan, "Ka unaunu fapa puala ka tih a ni a, tarmit kan vuah dun avanga a tan liau liaua ka hlan a ni. Referee Deniz Aytekin pawh ka hrilh a, ngaihdam min dil tawh," a ti. Spain hian Pathianni zanah Faroe Islands an mikhual leh dawn - La Roja hi match nga an khelh tawhah an la tlawm miah lo.
Goal a sur
Sweden-in Euro khelh ngei an duh a, an duhna khelmualah an lantir - an mikhualna ramah Faroe Islands an zah der duh lo a, 4-0 zetin an va sawp - match ngaah point 10 an nei ta.
Mikhual team tan hian Real Sociedad forward Alexander Isak chuan goal hnih a khung a, Manchester United defender Victor Lindelof leh Mainz 05 forward Robin Quaison ten goal khat ve ve an thawh bawk.