MPL8 Kickoff a ropui

MPL kan nei hi Mizo ṭhalaite tan hian a hlu takzet a, hma kan sawn phahin eizawna a hmang tam tak kan awm phah. Mizo player zawng zawng aiawhin lawmthu ka sawi. MPL buatsaihtu MFA leh Zonet bakah sum leh pai tam tak senga league leh club sponsor-tute fakin awm rawh se.

Zanina kalkhawm tam zawk hi zirlai leh ṭhalaite kan ni a, zirna a pawimawh hmasa tih ka sawi duh. Mahni career tichhe turin games kan atchilh tur a ni lo a, ruihhlo lakah kan fimhlim tur a ni. Eng kawng pawh zawh dawn ila zirna a ni emaw infiamna leh a dangte pawh tih tak takna leh tum ruhna, taimakna leh chhelna nen a kan beih chuan Pathianin min hlawhtlin tir ṭhin a ni.

Ka ṭhalai puite Zoram mipuite leh zohnahthlak zawng zawngte kan ramah cancer natna leh zu leh damdawi hman sual avanga thi kan tam em em a, heng natna lakah fihlim tur hian keimahni ṭheuh kan pawimawh. Kan taksa hi kan ta a ni tih hre thar ṭheuhin duat takin enkawl ila - zuk leh hmuamah insum ila, ei leh inah fimkhur ila, taksa sawi zawi lamah tun aia nasa hian ṭan ila thar ang u.

Zaninah Grassroots naupangte kan hmu a, Mizote zingah a bikin footballer nih tum naupang kan tam hle. Ka chah duh che u chu lehkha zirna kha lo thlahthlam reng reng lo ula zirna tibuai lo zawnga inkhelh theih dan hram lo zawng rawh u. In vannei hle, keini chu hetiang zirna ṭha dawng loh hian tun hun hi kan thleng thei a, zirna ṭha in neih tawh avangin kei aia sang thleng thei vek in ni.

MPL khel tur player zawng zawngte infiamna rilru pu chunga thianghlim tak leh ṭha taka khel turin duhsakna ka hlan a che u.

Mizoram Premier League Season 8 chu September 5, Ningaini zan khan ropui takin Lammuah a khuhhawnna neih a ni a, kickoff-tu Jeje Lalpekhlua chuan football aia zirna dah pawimawh hmasak a ṭul thu a sawi. Mizoram football inelna sang ber MPL hi season sarih khelh a ni tawh a, hengahte hian kickoff hi hall chhungah neih a ni ṭhin.

Season riatnaah MPL leh Zonet-in bung thar kaiin Lammualah kickoff an nei a, Mizoram chhunga open air-a ennawm ropui ber zinga mi an chhawp chhuak.Kickoff-naah hian MPL club pariat Aizawl FC, Chanmari FC, Chawnpui FC, Chhinga Veng FC, Electric Veng FC, FC Venghnuai, Mizoram Police FC leh Ramhlun North FC ten player-te rawn pho chhuakin Mizo hnam lam an rawn lantir a, Mizoram Police-in band party an rawn nei bawk.

Tata Football Academy seventh batch-a best cadet Robert Lalthlamuana chuan MPL player-te oath taking an neihpui. India international Robert hi Mizo footballer hlawhtling ber zinga mi niin Churchill Brothers, East Bengal, Delhi Dynamos, Atletico de Kolkata tan khel tawhin tunah hian NorthEast United FC tan a khel mek.

Kickoff-naah hian club model-in jersey an rawn pho chhuak a, MFA Grassroots naupangin awmze neia rawn inremin mipui pungkhawm tan hmuhnawm an lantir a, MPL Kickoff awm tawh zinga ropui ber ang hiala chhal theih a ni.