Barcelona lakluh thar Braithwaite

Barcelona chuan Ningani khan Leganes aṭanga an lak thar Martin Braithwaite an tlangzarh a, pound maktaduai 18 man Danish striker lakluh dan hian sawizui a hlawh hle.

La Liga danah player chu thla nga aia rei a inhliam chuan a aiawh tur lak phalsak an ni a, Ousmane Dembele chu thla ruk chhung hliam vanga an chhawr theih loh avangin Barcelona hian dan angin player an lalut thei. Catalan club hian tla thei dinhmuna ding Leganes top scorer Braithwaite an chhuhsak a, La Liga dan sawiseltu an tam hle.

Barcelona hian Dembele awm lo mah se tlarhmaah Lionel Messi, Antoine Griezmann leh kum 17 mi Ansu Fati an la kawl tho. Leganes erawh an forward dang Guido Carrillo, Roger Assale leh Miguel Angel Guerrero ten La Liga-ah goal an khung lo a, tla thei dinhmuna ding club hian player an lak ve theih tawh si loh avangin hmabak a thim hle.

La Liga dan hian club lian sate a vulh avangin sawisel a hlawh a, chutihrualin Middlesbrough-a hlawhchham tawh Braithwaite hi Barcelona tan a khel pha kher ang em tih pawh a chiang lo. Kum 28 mi Braithwaite hian an tlangzarhnaah ball a sep sual a, buyout clause-ah euro maktaduai 300 (£251m) zet a neih avangin fiamthu thawh nan an hmang.

Chutihrualin Leganes tan erawh Braithwaite an chan avangin La Liga khelh zel a harsa dawn a, vawiin tlai dar 5:30-a Celta Vigo an tlawh hunah pawh point hlawhchhuah a harsat phah ang. Barcelona-in zanin dar 8:30-ah Eibar an mikhual dawn a, Lionel Messi telna team tan champion turin point hloh a thiang tawh lo.