Tleirawl Andreescu tan US Open nomawi

Bianca Andreescu hming chu US Open khelh a nih chhungin a dai tawh dawn lo. Canadian tleirawl duhawm hian Serena Williams chu 6-3, 7-5 a hnehin New York khawpuiah champion nomawi a chawi a, tennis thawnthu thar a ziak.

Inrinni, keini lama Pathianni zing khan hmeichhe singles final hi khelh niin Andreescu hian darkar khat leh minute 40 chhungin Serena hi a hneh. American nulain a vawi 24 nana Grand Slam title lak a tumna chu a dal ta rih a ni.

Canadian nula zingah kum 19 mi Andreescu hi Grand Slam champion ni thei hmasa ber a ni a, Maria Sharapova (Wimbledon 2004) hnung zuiin kum 20 hnuai lam major tournament-a hlawhtling leh thei hmasa a ni nghal bawk.

Arthur Ashe Stadium-a inkhelah a tir aṭangin Andreescu a che fuh zawk a, a forehand na tak hmangin inkhel a thunun. Seeded 15-na hian harsa lo taka set a lak hnuah set hnihnaah pawh a che ṭha chhunzawm.

Kum 37 mi Serena a chefuh hlei thei lo, nidang angin a service a ṭha tawk lo. Set hnihnaah seeded pariatna Serena hi 5-1 ngawtin a hnufual a, a beiseina thamral mai tur chu fans lamin an uipui a, nasa takin an au phur.

American nula hian a khingpuiin match point a hmuh hmasa chu winners ropui tak hmangin a inchhanhim. Mahse, a hnuah a service na tawk lo chu Andreescu-i'n na zeta vuak let sakin, winners ṭha bik hmangin hnehna 

a chang.

Hnehna a chan hnuah Andreescu chuan,"Tun hma aṭangin hetiang hun thlen theih hi ka châkin ka suangtuah ṭhin. Mahse, ka duhthusam chu a taka a thlen theih ka beisei ngai meuh lo, tunah erawh a takin a rawn thleng ve ta reng mai. A mak a, sawifiah mai thei pawh a ni lo.

"Set hnihna kan khelh lai khan, 5-0, 5-1, 5-2 a ni hman. Fans lamin an au phur nasa em em a, kei pawh zep loh chuan ka zam. Serena khan a rawn khel ṭha telh telh a, min pawtthla mai dawn niin ka hre hman. Mahse, ka khelh dan phung ka chiang a, mipui au leh thawm bengchheng kha chu ka hre lo der," a ti.

Season hmasa kha chuan Andreescu hian Flushing Meadows-ah hian seeded nih phak chu sawi loh, qualifier-ah pawh round hmasa ber a paltlang zo lo - world number 200 huangah a lang phak lo. Tunah erawh ranking chhuak tharah chuan pangana dinhmun a luah ang.

Season thum liam ta mai kha a la ni, khatih hunlaia kum 16 mi Andreescu hian US Open champion tena an dawn ṭhin ang 'cheque' ang a insiamsak! Canadian tleirawlin Grand Slam champion nih a chakzia chu hei hian 

a ti chiang.

Tunah chuan US Open champion a nih vang chauha a dawn pawh £3.1m (maktaduai 275 chuang) zet a ni. Pawisa chungchang an zawhna chhangin Andreescu chuan, "Min zawt suh u, sawi vak tur ka hre lo. Hetianga tam hi ka dam chhungin ka la nei ngai lo," a ti.

US Open hma khan Andreescu hian Indian Wells leh Toronto-ah te WTA titles a lo la tawh a, a kum la tlemin tawnhriat nei tam rih lo mah se tennis player beiseiawm leh mi ngaihven ber zingah a tel ta. Eng chena thui nge a thlen theih dawn tih chu hunin a la hril ang.