Level 1-ah Mizoram an tling

Basketball Federation of India buatsaih 46th Sub Junior National Basketball Championship 2019-ah Mizoram chuan champion rinkai zinga mi Rajasthan hnehin semifinal an lut a, basketball thiam zinga chhiar tel niin Level 1 an kai ta bawk. Inelna hi Cuttack, Odisha-ah neih a ni.

Mizoram hian semifinal thleng tur hian group stage-ah Goa (89-1) leh Delhi (58-18) te an sawp a, second round-ah Level 2 team zinga mi Telangana chu 54 - 26 in an sawp. Pre quarterfinal aṭangin Level 1 team an inlan ṭan a, Mizoram tan pawh thlan tlak ve theihna tur ni tawhin Uttar Pradesh chu 77-53 in an hneh. Uttar Pradesh an hneh chiah hian Mizoram hian Level 1 an kai a, nakkuma Sub Junior National Basketball Championship an khelh hunah chuan Level 1 aṭangin bul an tawh ang.

Inrinni zan khan quarterfinal hi kheh nghal a ni a, Mizoram hian 85-77 in Rajasthan an hneh. Quarterfinal aṭang hian indoor-ah khelh a ni a, tun hma ang a ni tawh lo. Mizoram chhungah indoor stadium ṭha a tam tawh avangin Sub Junior National Basketball Championship-ah pawh hian khelhna hmun ṭha hi buai nan hmang loin an thiamna lanchhuahtir nan an hmang.

Mizoram coach Marc L. Sailo chuan, "Indoor kan kai ta bawk a, entu pawh kan ngah hle. A hmunah pawh kan khelh dan hmang an lawm a, min fak ve hle. Inkhel entute pawhin min ṭan a, Mizoram ṭanin an au hum hum a, lawmawm tak a ni. Indoor-a inkhel chin hi chu Selection Committee leh Officials ho hian an en bik a, Mizo naupangte hi National Coaching Camp-ah pawh an thlan ngei kan beisei hle a ni," tiin Vanglaini a hrilh.

Mizoram hi coach Marc (Zarkawt) leh assistant coach ZD Denghmingliana ten an ho. Nizan khan semifinal-ah Mizoram hian Maharashtra an hmachhawn a, result kan hre hman lo. Mizoram hian hnehna an chang a nih chuan zanin hian Punjab leh Haryana chak zawk nen nomawi an inchuh ang a, an chak lo a nih erawh chuan a chak lo zawk nen pathumna an zawng ang.