Mama enkawl Chanmari FC an chak

Mizo football legend tih hiala sawi S. Malsawmtluanga'n Mizoram Premier League-a club a enkawl hmasak berah Chanmari FC hnehna a chanpui a, Zirtawpni zan khan Lammualah Ramhlun North 3-1 in an hneh.

Chanmari FC tan hian H. Lalmuankima'n minute 16-na lekah khung mah se Ramhlun North-in first half hma chiahin captain Jessy Vanlalmuana hmangin an sut. Second half-ah Lalnunzama'n mawi tawpa mawiin goal ṭha bik a khung a, minute 54-naah Chanmari hma hruaipui nawn lehin injury time-ah MS Dawngliana'n chak nemnghehna goal a khung.

MPL8 round hmasa berah Chanmari leh Mizoram Police chiahin an khingpui an hneh a, goal khung tam zawk Mama hote chu hmahruaitu an ni rih. Club ṭha pahnih hi September 12-ah an inhmachhawn nghal dawn a, pakhatna dinhmun luah reng a awlsam dawn lo.

Chanmari tana chanchin lawmawm chu Zama goal a ni a, Laipuitlang tlangval hian chance ṭha hlah bawk mah se a goal khung hi mi nazawng khung theih a ni lo. Khelo India U17 best player hlui Zama hian box pawnah ball changin petna tur khawp insiam turin inrintawkna a nei a, goal kilah tak kawh zetin a pet lut. Zama hian MPL7-ah khan goal ruk khungin match hmasa pangaah goal a khung vek.

Mama hman theih turin Chanmariin MPL2-a champion puitu Bawngkawn duo MK-a leh Dawngtea te an lalet. MK-a'n goal leh assist a nei a, a phu ang ngeiin man of the match hlan a ni. Dawngtea pawhin goal nen bul a ṭan bawk.

Chanmari hian Ramhlun North lakah 66% ball possession an nei a, round 1 bika ball chang tam ber an ni. Chutihrualin Chanmari hian awmze neiin goal an nawr tawk lo a, Tata Trusts COE-a coach hna chelh avangin Rochhingpuia an chan a, midfield luah lum turin an fapa rangkachak thlakna tur an mamawh. Zama'n goal ṭha bik khung lo se point hnih hloh thei dinhmunah an ding.

MFA-in tun season aṭangin AIFF Centralized Registration System an hmang ṭan a, CRS vanga buai zingah Ramhlun North an tel. MPL8 khel tur hian MFA-a inziahluh a tawk lo a, player zawng zawng hi AIFF hriatpui an nih a ngaih avangin CRS-a hming chuangte chauh an inlan thei a, inkhelh ni chawhnu thlengin  Ramhlun North-in starting eleven daih player an la nei lo!

Inkhelh ṭan dawnah player tam zawk ziahluh ni tawh mah se inkhel bul ṭantu tur thlak danglam a ngaih phah hial. Hetichung hian Jonathan Lalrintluanga hote hian ṭha takin an khel a, tawnhriat nei ṭha an neih tlemte zinga mi Lalmawizuala (Ashtea) leh Jessy Vanlalmuana te an khel ṭha hle. Ramhlun North hian September 13 hian Chawnpui FC an hmachhawn dawn a, MPL-ah point hmuh a harsat avangin an elpui tawk tura ngaih laka point an hmu lo a nih chuan semifinal kawng tih zimin a awm nghal ang.