Khabib a thlawk sang zual zel

"Mupui rilṭam chu sang takah a thlawk ṭhin," tiin 'Eagle' tia hminglem an pek Khabib Nurmagomedov-a'n Dustin Poirier a vau lawk a, mupui rilṭamin a 'chaw' tur a hmu fuh ta. 

Inrinni zan khan UFC Lightweight Championship-ah Khabib leh Poirier an intawng a, Russian fighter Khabib-a 'rear-naked choke' tuar zo loin Poirier hi round thumnaah a tlawm. Kum 30 mi Khabib tan October 2018-a Conor McGregor a hneh hnua a match neih leh hmasak ber a ni a, vawi 28 MMA fight a hmachhawn tawhah a la chak kim vek!

McGregor chuan Russian fighter hi lo cho nghal vatin, "Moscow-a kan intawnna tur buatsaih ru," tiin twitter lamah a ngam loh val a cho nawn. 

Inrinni zanlaia fight hmuhnawmah Khabib-a chungnung nghal a, kum 30 mi Dustin Poirier hian kawng engkimah a ngam lo a ni ber. 'Sambo wrestling' style-a fight hmachhawn ṭhin Khabib-a 'wrestling' hi fighter tam tak buaina a ni a, American fighter Poirier pawhin hei hi a chelh lo. 

Poirier hian Khabib hnek thluk theih beiseiin a kut lek chhuak ṭhin mah se Russian fighter hmai a kuttumin a zawng fuh thei lo ṭhin a, a talbuai. Round thumna ṭantir lamah 'guillotine choke' hmangin Khabib hi tlawm ṭep mah se Russian fighter a tho chhuak leh a, 'rear-naked choke' hmangin Poirier a tlawm ta zawk. 

October 2018-a Khabib leh McGregor an inhmachhawn ṭumin buaina a chhuak a, Khabib hian fight hmachhawn lawk thei loin hremna a tawh phah. Mahse, Abu Dhabi, United Arab Emirates-a Khabib leh Poirier inhnekah erawh engkim a danglam a, Khabib hian American fighter hi in fight zawhah panin a kut chu chung lamah a pharsak. 

Khabib chuan, "Dustin Poirier nen khan MMA hi ṭawngkam bawlhhlawh tak taka inbeihna hmun a ni lo a, zahawm takin a lantir theih tih kan pholang a ni," a ti. Russian fighter chuan a chhungkua, sakhua leh hnam hmusita a lo puh tawh McGregor nena an buaina chu theihnghilh a duh tawh thu a sawi. 

Khabib-a'n Poirier a hneh hnu lawkah zawhna a awm nghal a, tun dinhmuna UFC fighter ṭha ber Khabib hmaa ding leh tur mipuiin an hre chak. 

McGregor-a'n Khabib hmachhawn leh a duh thu a sawi tawh a, UFC president Dana White chuan fighter pahnih hi an in hmachhawn leh mai theih thu a sawi ve bawk. Dana chuan, "Tony Ferguson chu Khabib hmaa ding leh tura ruahman sa a ni a, mahse Tony hian chhan ṭha tak vangin a thei lo ve thei. 

"Chutiang a thleng a nih chuan ngaihtuahna kan seng ang a, McGregor pawh a ni thei. Irish fighter hian inhmachhawn leh a châk a, mipui pawhin hmuh an duh tih ka hria," a ti. 

Khabib hian Poirier a hmachhawn avang hian pound maktaduai 5.2 vel a neih belh niin sawi a ni a, McGregor a hneh ṭum khan pound maktaduai 1.75 vel a hlawh. Poirier-a hlawh tur zat hi sawi a awm lem lo a, mahse Khabib-a'n McGregor a hneh ṭuma a hlawh ang zat kha chu hlawh tura ngaih a ni. 

UFC 242-a fight ngaihven hlawh dangah Paul Felder chuan 27-30, 29-28, 30-27 (split decision) hmangin Edson Barboza a hneh ve bawk.