Mizoram Under 15 League khelh ṭan a ni ta

Mizoram Football Association leh Tata Trusts ṭangkawpin an buatsaih Mizoram Under 15 League Season 2 chu September 7, Inrinni khan Rajiv Gandhi Stadium, Mualpuiah khelh ṭan a ni.

Mizoram Under 15 League hi hlawhtling takin season 1 neih a ni tawh a, Tata Trusts Centre of Excellence an champion. Season hmasa bera khel zinga mi pathum ngawt chu India Sub Junior team atan koh an ni a, hmasawnna duhawm tak a ni.

Rawlthar rual inelnaah hian team 10  - Aizawl FC,  Aizawl Grassroots Centre, Bawngkawn GSA, FC Armed Veng South, FC Stonzz, Kanan FC, Kulikawn FC, M28 Academy (Republic Veng), Sihphir Venghlun FC leh Tata Trust Centre of Excellence te an inel dawn. Team 10 te hi an inkhelh kual hnuah a sang paliin semifinal khelin chumi zawhah final khelh a ni ang.

Under 15 hi school kal tibuai lo turin school chawlh apiangin an khel ṭhin ang. AIFF lamin an beisei angin kumin aṭang hian AIFF hnuaiah Central Registration System (CRS) and Competition Management System (CMS) tih vek a ni a, hei hian kum dik lo vanga buaina a tih kian ngei beisei a ni.

Inelnaa tel hrim hrim hian lawmman an dawng vek dawn a, fair play award a awm dawn. Position tin lawmman bakah best player thlan a ni ang a, mimal lawmman hian Rs 2,000 ṭheuh a keng tel.