Ronaldo-a'n goal a khung leh ta

Cristiano Ronaldo a chul thei lo. Kum 34 mi zet ni tawh mah se vanglai hun hmang ang maiin Ronaldo a la vul reng a, Inrinni zan khan Portugal tan goal a khung. 

Euro 2020 qualifier-ah Portugal hian 4-2 in Serbia an hneh a, match thum khelh tawha an vawi khat chakna chiah a la ni rih thung - hmabak a la ko. Portugal tan William Carvalho (42') leh Gonçalo Guedes (58') ten goal an khung hmasa zet a, Serbia tan Nikola Milenkovic chuan minute 68-naah a chhanglet. 

Mualneitu Serbia an phur tak tak hmain Ronaldo a lo lang a, Juventus forward hian minute 80-naah an goal thumna a rawn khung - ram tan match 159-a goal 89-a khungna chiah a ni. Fulham striker Aleksandar Mitrovic-a'n minute nga hnuah beiseina siam ve leh mah se Serbia team an harh zo lo a, Bernardo Silva chuan Serbian fans au thawm pawh a reh hmain a khung ve lehnghal. 

Minute thum a la awm tihin Serbia tan Real Madrid striker Luka Jovic lut mah se danglamna a thlen phak tawh lo a, mahni mualah 4-2 in Serbia an tlawm. Thawhlehni zanah group B inkhel pahnih a awm dawn. Portugal (5 pts)-in  Lithuania (1) an lenchilh ang a, Serbia-in anmahni ang bawka point li hmu Luxembourg an tlawh ang.