Zidane tan tawpna ni a hnai em ni?

Real Madrid-a Zinedine Zidane-a thawnthu hian ngaihnawmna danglam tak a nei - an ban tawh mai dawn emaw tih laiin a nghet em em a, a nghet viau emaw tih laiin a lo nghing leh ṭhin!

Santiago Bernabeu-a French manager chanchin ngaihnawm lai sawi dawn chuan Champions League nomawi pathum leh La Liga nomawi pahnih sawi tel a ngai a, a ngaihnawm ṭhin.

Mahse, tleirawl inngaizawng ang maiin 'ban leh ban lo' karah thawnthu a awm reng a, hmangaih thawnthu ngaihnawm tak karah, "An inban dawn," tia sawi ngai a awm leh ṭhin!

Season hmasa lawka La Liga nomawi chawitu hi Real-in ban an duh nia sawi thawm a awm leh tawh a, Zidane hian Santiago Bernabeu-ah eng chen tak daih ang maw?

Spanish Super Cup semifinal aṭangin Athletic Bilbao-in Real an pet chhuak a, fan-te thinlung na pawh a dam hmain Copa del Rey round of 32 aṭangin petchhuahin an awm zui. 

Real ṭantute rilru natna lian tak pakhat a awm - anmahni pet chhuaktu Alcoyano hi third division club an ni a, extra time-ah Alcoyano player hnawhchhuah a ni bawk. 

Lehkha aṭanga thlira 'hneh sa' team-in Real an pet chhuak a, Spanish media-ten chaw tui berah an nei zui. Chanchinbu lar AS chuan, "Real chanchin ziahna pheka chhiar zahthlak ber lai a ni," an ti hial!

Spanish chanchinbu lar Marca chuan, "Zidane hi an la ban lo cheu a nih chuan thilmak a ni ang," tiin an ziak a, French manager a cham reng an ring lo. 

Khawthlang media-ten Zidane-a ban mai an rin em em lai hian, Spanish football hrechiangtu Guillem Balague erawhin French manager hian ban tawk dawn mah se tun tut tutah a nih loh tur thu a sawi thung. 

Balague chuan, "Real thuneitute chuan season laklawh laia thutlukna siam an duh lo a, season tawpah thutlukna lian tham tak an siam ang," a ti a, Zidane tan thu hriat nuam a nih ring suh. 

Spanish football expert Guillem Balague hian a duhtawk mai lo, kum 52 mi journalist lar chuan, "Zidane hian harsatna aṭangin a team a lo khai chhuak fo tawh a, tun ṭum erawh an dawhtheihnain a tawp a thleng ve tawh a ni," a ti. 

Balague-a ṭawngkam aṭanga a lan dan chuan Real hian Zidane-a chungah rinna an nghat ngam tawh lo a, season laihawla team tihbuai an duh loh avang chauhin thutlukna an la siam lo.  

Ṭhenkhatin an ṭawngtam luat tuar loin harsatna an tawk a, ṭhenkhatin nupuite kam tam zar zoin ṭhenawm khawvengah 'ṭawngṭhei chhungkua' nih an hlawh - Real thuneituten Zidane ban an duh ve chhan erawh a ṭawng tlem lutuk hret chu a ni!

Real hian tun hnaia Athletic Bilbao leh Alcoyano an ngam loh hma hian result duhawm lo tak tak an lo nei tawh a, chung zingah chuan an mual ngeia Cadiz leh Shakhtar Donetsk an ngam lohte, Valencia laka 4-1 a an mualpho te, mahni muala club tenau Alaves an ngam loh leh khualmuala Shakhtar an ngam lohte chu a tel.

Mahse, Real result ṭha lo piah lamah hian club thuneituten lungawi lohna an nei a, chu chu Zidane-a'n player-te thu ṭha a hrilh hnem tawk loa an hriatna chu a ni  - French manager hian kam tam a tum tlat lo!

Balague chuan, "Result duhawm lo tak tak an nei ngei a, mahse chu chauh chu Zidane chunga club thuneitute lungawi lohna a ni lo. Alcoyano nen extra time an khelh dawn khan player-te bulah engmah a sawi lo a, extra time chawlh lawkah khan a ngawi leh reng bawk. Hei hian Real ho hi an player ṭhatna leh thiamnaah ngawr ngawr innghatin, coach aṭangin thu ṭha an dawng ngai lo tih a nem nghet a ni," a ti!

Real thuneituten an player langsar leh kum tam ve ṭan tawh Toni Kroos, Casemiro, Luka Modric leh  Karim Benzema-te thiamna an hai bik lo a, mahse, anni hi rinrawla nei reng loa Dani Ceballos, Vinicius Junior, Rodrygo, Achraf Hakimi, Brahim Diaz, Sergio Reguilon, Luka Jovic leh Martin Odegaard-te ho hmanga team naupang zawk din a, hma hun atana lo inbuatsaih lawk an duh. 

Zidane-a ngaih dan a dang thung. French manager hian player tha za rual chhawr ai chuan a rin sa leh hmanthiam sa ho chhawr a thlang zawk a, club thuneituten chhawr atana an duh em emte hi a ṭhen chu hralh an ni a, a ṭhen erawh loan hmanga chhuahtir an ni bawk.

Real player zingah chhawr mang loh Mariano Diaz, Federico Valverde, Alvaro Odriozola leh Eder Militao-te pawh club thuneitu lam chuan inkhel bul ṭan tam deuh turin an duh a, mahse, Zidane-a'n ngaihdan dang neiin inkhel pawimawh  lo deuhah heng player-te hi bul a ṭantir ṭhin!

Balague chuan, "Player hlawhtling tak tak lo ni tawhte leh player tharte inkar hi a zau viau a, club-in inthlak danglamna an duh chu Zidane hian a ti thei lo bawk - Club hian season kal lai tihbuai an duh lo a, mahse, Zidane-a hun chu a liam ve tawh ang hialin an ngai a ni," a ti a, season tawpah chuan Zidane hi a chhuah ngei hmel.

A eng emaw zawng tak chuan Real thuneitute hi an dawh thei phian - Balague-a'n an dawhtheihnain a tawp a thleng ve tawh angin tarlang mah se season tawp hun an la nghak hram a, Balague vek hian, "Club legend a ni a, hei vang hian an kal zel dan hi an thlir reng dawn a ni," an ti. 

Chumi awmzia chu Zidane hian thilmak a thlentir a, nomawi nen season a khar thei a nih chuan ban lohna chance a awm tihna a ni - La Liga leh Champions League nomawi chawi kawp ta se, Zidane ban chu thil attthlak tak a ni daih thei. 

Tuna Real dinhmun thlir erawh chuan he thilmak hi a thlen a rinawm chiah lo a, chutihrual chuan Zidane hian Real-a enkawl hmasakin season thum chhung a zawnin Champions

League nomawi a chawi a, La Liga (1), Club World Cup (2) leh UEFA Super Cup (2)-ah  a champion a, March 2019-a a lo kir hnuah season thum hnua a vawi khat nan La Liga nomawi a chawipui leh bawk tih hriat a ṭha. 

Zidane hian 'thilmak' thlentir tura a mamawh leh hmasa ber erawh chak dan hriatchhuah leh a ni a, zanin dar 8:45-a league match an khelh hunah Levante hneha bul a ṭan a ṭul ang.