January-ah Neymar kan la lo ang - Bartomeu

Barcelona president Josep Maria Bartomeu chuan January thla bazar hun inhawn hunah Neymar an lak loh tur thu a sawi, Paris St-Germain forward tan thu hriat nuam a ni lo ang.

Nipui bazar chhung khan Neymar hian chhuah a duh a, mahse Paris club lamin an chhuahtir duh dan leh amah ngaihventute duhdan a inhmu rem lo a, rilru bet lo tak chungin Ligue 1-ah a inlan chhunzawm a ngai dawn.

Brazil international hi a club hlui Barcelona nen an inhnaih leh hman hle. Amaherawhchu inremna a awm thei lo. January-ah Neymar lak an tum em tih zawhna chhangin Bartomeu chuan, "Tum lo, tunah chuan tumna a 

awm lo," a ti.

Copa America inbuatsaihna an neih laiin Neymar hi a hliam a, tun season-ah a club tan a la inlan lo. Zirtawpni khan Brazil leh Colombia ten friendly match an khelhah a inlan a, goal khat khungin 2-2 in an inhnehtawk. Kum 27 mi Neymar hian ram tan match 98 a khelh aṭangin goal 61 a khung tawh a, world champion vawi nga ni tawh Brazil tana goal khung hnem lamah Ronaldo (62 Goals) leh Pele (77 Goals) te chiah tluk loh a nei tawh a ni.