Maradona-a'n team enkawl leh dawn

Diego Maradona chuan team enkawl hna a thawk leh dawn, Argentina legend hian an ram club Gimnasia y Esgrima La Plata chu season tawp thleng enkawl turin contract a ziahpui.

Kum 58 mi Maradona hian player a nih lai 1986 World Cup-ah an ram a champion pui a, a hnu lamah an la champion leh lo. Player a nih laia a sulhnu ropui hi an la sawi ning lo, coaching lamah erawh chhuan tur a nei vak lo thung.

Maradona enkawltu Gimnasia hi El Lobo tia sawi a ni bawk a, a awmzia chu 'Chinghnia' tihna a ni. Tunah hian Primera Division-ah a hniam ber an nih avangin a hna hi a awlsam dawn lo hle.

Argentine club Gimnasia chuan thuchhuah siamin, "Diego Maradona chuan kan club enkawl turin hming a ziak ta," an ti. Pele nena FIFA Player of the 20th Century award dawngtu Maradona hian hna thar a nei chu a hlim thu a sawi ve bawk.