Hansi Flick hmalam hun a chiang lo?

Germany chanchinbu Bild chuan Bayern Munich manager ni lai Hansi Flick-a'n kum 2023 thleng Allianz Arena-a a cham turin contract nei mah se tun season bak a dinhmun a chian loh thu an ti chhuak. German manager chungchang hi thudik a ni lo thei a, chutihrualin thu thang satliah a nih loh chuan Bavarians hruaitute tan chinfel ran a ṭul dawn a ni.

Bayern Munich hian kum 2019 khan manager Niko Kovac an ban a, assistant manager Hansi Flick chu manager atan an ruat a, Jupp Heynckes hnua treble champion leh thei hmasa ber a ni nghal. Bavarians hi Pep Guardiola pawhin hlawhtling takin a enkawl tawh a, amaherawhchu Spanish manager meuh pawh hian Champions League a chawi thei lo. Tun hnaia manager dang Carlo Ancelotti leh Niko Kovac te phei chu an hlawhchham tiha sawi theih a ni a, Flick hi a chhuak a nih ngat chuan a hmunruak luah khat a harsa ang.

Tun season tawp rual hian Bayern chairman Karl-Heinz Rummenigge chu a bang dawn a, ani hian Hansi Flick a thlawp ṭha hle. Bild-in a tarlan dan chuan Flick hi Bayern CEO thar tur hi club legend Oliver Kahn leh  sporting director Hasan Salihamidzic te hi transer chungchangah an thu an inhmu lo.

Hemi ti lang chiangtu chu Bayern player thar winger Leroy Sane, keeper Alexander Nubel leh forward Eric Maxim Choupo-Moting ten hmun pawimawh an chang pha lo. Kahn hian veteran defender Jerome Boateng contract pawhseisak a tum lo nia sawi a ni a, hetihlai hian Flick erawhin David Alaba hmalam hun a chian loh avangin contract pawhsei a duh thung. 

Season liam taa an treble champion ṭum angin Bayern team boruak hi a ṭha tawk loa ngaih a ni a, club thuneituten Flick hi player tharte an theihna anga chhawr chhuak turin an beisei bawk. Chutihrualin khelmual pawn boruak ṭha lo chinfelna ṭha ber chu khelmual chhunga result ṭha an ni a, Flick-a hote hian season liam ta tluk lo hret mah se an result neih hi a la ṭha hle.

Zanin dar 8:00-ah Bayern hian Hoffenheim an mikhual dawn a, hnehna an chang thei a nih chuan an hmahruaina belhchhahin a awm dawn. Inkhel dangah pahnihna RB Leipzig leh pathumna Bayer Leverkusen te an inhmachhawn dawn a, he inkhel hi tun kartawpa Bundesliga inkhel ngaihven hlawh ber a ni ang.