Aw, thawhlehna ropui - Spurs hnehtu!

Premier League nomawi chawi tum Liverpool-in an mangchhia an mangṭha a, harh tharna an chang leh ta - Ningani zan khan champion tuma an elpui Tottenham Hotspur chu 3-1 in an hneh. 

Liverpool tan Roberto Firmino, Trent Alexander-Arnold leh Sadio Mane-ten goal khat ṭheuh an khung a, Spurs tana Pierre-Emile Hojbjerg goal khungin awmzia a nei lo. 

Reds-in league match nga chhung a zawna hnehna an chan zawh tawh loh hnuin hnehna an chang ve leh ta a, table-ah palina an ni ve leh ta - hmahruaitu Manchester City nen an inthlauhna chu match khata khel tam chungin point li chauh a ni ta. 

Hetihlai hian Jose Mourinho-a Spurs erawh paruknaah an awm chhunzawm a, Liverpool aiin point liin an hnufual - match khatin an khel tlem thung. Liverpool hian Pathianni zan dar 10:00-ah team 'form' tak West Ham an lenchilh zui dawn a, Tottenham Hotspur-in Pathianni zan dar 12:45-ah Brighton & Hove Albion an lenchilh zui thui ang. 

Tottenham Hotspur Stadium-a inkhel ṭantir lamah Spurs-in game an thunun a, Liverpool an talbuai dawn niin a lang hman - Son Heung-min chuan player-te thlantui pawh a far hman lo ang tih turah goal a rawn khung nghal. 

Liverpool an hawihai a, Jurgen Klopp-a hmel enin a nuih a za lo tih a lang chiang - mahse, Klopp leh a player-te lawmna turin video assistant referee a inrawlh a, offside vangin Spurs goal hi pawm a ni lo. 

Inkhel ṭantir lamah Liverpool tlarhnung an talbuai deuh a, Fabinho inhliam vanga centre back-a khel Jordan Henderson leh hliam damkawr Joel Matip-te an inkawp avangin a awm lo hran lo - tlarhma lamah Reds an hmuhnawm tulh tulh a, first half hun pek belhah goal tak tak kan hmu ta.

Jordan Henderson-a'n Reds tana player pawimawh a nihzia pholangin ball ṭha tak a vawrh lut a, Sadio Mane chuan a awma la thlain Firmino tan a siamsak. Brazilian forward hian Eric Dier leh Hugo Lloris inringthul karah goal hi a khung a, 1-0 a ni. 

Premier League champion Liverpool-in an league match hnuhnung pangaah chak an nei lo a ni mai lo a, heng zinga match liah hian goal an khung lo - Liverpool nen chuan inhmeh lo tak a ni. 

Mahse, Spurs an vanduai. Liverpool insiamṭhat zan kher kher an nang fuh a, second half ṭan aṭanga minute hnihna lekah Trent Alexander-Arnold chuan Reds goal hnihna a rawn khung. 

Mane-a goal shot chu Lloris-a'n dang hman mah se a per chu Arnold ke bulah tak a tla a, Liverpool academy chhuak defender hian harsatna nei loin goal-ah a chantir. 

Arnold-a goal khung aṭanga minute hnihna lekah Hojbjerg chuan yard 20 vela hla aṭangin kawh zetin Spurs si phurh a sut ṭhen a, an hlim chhung erawh a rei lo hle - Reds goal hmasa pahnih thawk chhuaktu Mane chuan Arnold-a ball siamsak chu goal-ah a chantir a, 3-1 in inkhel a tawp. 

Premier League champion-in an theihna ang tak taka an khelh chhuah chuan team hmuhnawm tak an la ni reng tih hmuh turin a awm a, Spurs-in kawng tinrengah an chelh lo. 

English top flight-a player inkawp hmuhnawm ber pawl Son leh Harry Kane-te Reds hian tel ve lo ang maiin an dah ṭha thei a, English striker Kane phei chu minute 45-naah hliam vangin lakchhuah a ni. 

Reds tan tlarhnungah Virgil van Dijk awm loh laiin Fabinho chu centre back-ah chhawr a ni a, mahse, Brazilian midfielder hi hliam vangin Spurs lakah a inlan thei bik lo - manganna tham a ni. 

Klopp-a'n tlarhnungah Henderson a pawt chawp a, Liverpool captain hian legend Steven Gerrard hnen aṭanga captain armband a rochun chhan pholangin a khel ṭha hle. Second half-ah hliam vangin Matip lakchhuah a ni a, Hendo-a'n tawnhriat nei tlem Nathaniel Phillips kawp zui mah se an nghing tawh lo. 

Liverpool fan-te tana hmuh nuam tur chu an tlarhmain ngai an awh leh ta kha a ni. Firmino-a'n league match-a Spurs a hmachhawn hnuhnung paruka a goal ngana a khung a, Mane-a'n goal-a khung bakah Liverpool goal hnih dangah a inrawlh bawk. 

Goal khungtu zingah Mohamed Salah hming lang lo mah se Egyptian forward hi a thiam 'tak tak' tih hmuh turin a awm leh ta a, goal khung châka tuihal ṭhin Salah kha a lo kir leh ta!

Kum 28 mi forward hian Spurs nena an inkhelah pawh tawih zetin goal a khung hmanah a inngai a, mahse, Firmino handball vangin VAR hmanga ennawn a nih hnuah pawmsak a ni ta lo thung - Salah hian tun season inelna hrang hrangah match 29 khelin goal 19-a khung tawh a, assist vawi li a nei tawh. 

Jurgen Klopp-a'n FA Cup-a Manchester United an hneh loh ṭumin, "Kawng dik kan zawh leh ṭan tawh a ni," a ti a, chak loh kara a lawmna hi tam takin an nuih zat - Spurs laka Liverpool khelh chhunzawm dan an en chuan an nuih a za tawh lo ang. 

Spurs-in Liverpool an ngam lohna inkhelah chanchin lawmawm lo dang hriat belh tur an nei a, an striker chhuanvawr Harry Kane chu ke rek hliam vangin lakchhuah a ngai. 

Kane hian Liverpool midfielder Thiago Alcantara nen ball an inchuhna lamah a ke rek ding lamah hliam a tuar a, Jordan Henderson nen an inchuhna lamah a vei lam a ti na leh zui. 

Spurs manager Jose Mourinho chuan, "A hliam hmasa zawk aiin a hnuhnung hi a hlauhawm zawk. Pakhat chauh na chung kha chuan a khel lui thei a, a pahnih na chunga khelh chhunzawm kha chu a har a ni. 

"Kan hnufual laia Harry a chhuak a nih chuan a inhliam tihna a ni mai. Player ṭhenkhat hi chu an hmun ruak hnawh khah a harsa ṭhin a, theihtawp chhuah chhunzawm loh chu tih theih kan nei lo," a ti a, he thu buatsaih thleng hian Kane chawlh chen tur a chiang lo. 

Kane hian tun season inelna hrang hrangah match 29 khelin goal 19-a khung a, vawi 14 assist a nei bawk - ke rek hliam vangin buaina a nei fo a, tun hi a vawi khatna a ni lo. 

2018-19 season khan January 2019-ah a ke rek vei lamah hliam a tuar a, match sarih a khel thei lo. April-ah inhliam lehin match kua a khel thei lo bawk.  

2017-18 season khan a ke rek ding lam hliam vangin thla khat a chawl tawh a, 2016-17 khan vawi hnih ngawt a chawl bawk - a chawlh vawi khatnaah kar ruk a chawlh a, a vawi hnihnaah kar li a chawl.

Kan tih dik loh rah kan seng a ni. First half-ah khan hnufual tur kan niin ka hre lo a, thil kha a kal dik lo em em vek a ni. Ka ngaihdanah chuan first half-ah khan kan khel ṭha hle. 

1-0 a hnufual kha a awlsam lo a, Harry kan hloh zui bawk. Second half ṭantirah kan tisual leh a, khatiang kara rilru paukhauh put kha a harsa tawh a ni. 

Chuti chung chung chuan kan khel ṭha a, kan insiamṭha. Mahse, player naupang tak, khel ṭha em em Roden-a tihsual vangin kan chesual leh a ni. Hetihrual hian ka naute erawh a tawp thlenga an beih avangin fak an phu a ni.

- Jose Mourinho, Spurs manager

A hunah tak goal kan khung a, goal ṭha tak a ni. Vawiina ka thil hmuh kha 'form' tih lam a ni lo a, kha kha kan nihna dik tak chu a ni. A bik takin second half-a kan khelh dan kha kan nihna tak tak a ni - theihtawp kan chhuah a, football dik tak kan pho chhuak. 

Game ṭha tak, kan mamawh ngawih ngawih chakna a ni a, a hunah tak kan theihna kan pho chhuak. Nomawi inchuh zingah kan la tel reng tih hriat hi a nuam a ni.

- Jurgen Klopp, Liverpool manager