Sports Minister-in MFA Ground a tlawh

Mizoram Sports Minister Robert Romawia Royte chuan nimin khan MFA Ground, Sairang Dinthara artificial turf phah mek chu a tlawh a, "FIFA sum hmanga Mizorama hetiang hmalakna a awm hi ka lawm takzet a ni," a ti.

Sports Minister hi MFA hruaitute'n lo dawngsawngin khelmual siam mek thlen chinte hrilhin a hmunhma chei belh dan turte an enho a, Sports Minister chuan khelmual changtlung zawk neih a nih theihna tura ṭan lakpui a tum thu leh, a panna kawngpui pawh siam dan ngaihtuah a tum thu a sawi.

Robert Romawia chuan FIFA-in Mizorama khelmual an rawn siam dan chu sawiin, "FIFA-in hetiang min rawn pe hi football-a kan chet ṭhat vang leh MFA-te'n theihtawp an chhuah vang a ni a, ka lawm hle a ni. Sorkar hmasa khan khelmual a hlawhtlin theihna turin theihtawp an chhuah a, tun sorkar pawhin hma a lakpui a, a kianga hostel sak mekte a buaipui a, tihchangtlun chhoh zel hi a ṭha ang," a ti.

Sports Minister chuan, "Sports Minister ka nihna angin FIFA hnenah lawmthu sawi tur ka ni a, FIFA a nih tawh chuan football ngaisangtute chuan kan dah sang a, footballer leh football ngainatute an lawm ve ka ring a, sorkar pawhin kan hlut hle a ni. Khelmual a changtlun zel theihna turin sorkar pawhin theihtawp kan chhuah dawn a ni," a ti.

MFA Senior Vice President PC Vanlalhruaia chuan, "MFA-in khelmual kan nei tur hi kan lawmin kan phur takzet a, Sports Minister-in tun hnaiah vawi hnih a tlawh tawh a, min phurpui hle tih kan hria a, kan lawm a, a tihchangtlun zelna kawngah pawh min puih ngei a tum hi kan lawmna tizualtu a ni. He khelmual hi Mizoram pumin kan inṭawm tur khelmual a ni a, kan state team-te training na tur, kan player-te inchher hriamna hmun tur a ni a, MFA-in state pum a huap angin Mizorama footballer zawng zawngte khelmual tur a ni," tiin lawmthu a sawi.

Khelmualah hian artificial turf phah mek a ni a, turf-in a khuh tur zau zawng hi meter 111x74 niin thirlen sang taka hung chhuah vek a ni a; inkhelhna tur bik (playing area) hi metre 105x68 a ni ang. FIFA lam chuan February thla laihawlah hna hi zawh fel vek an inbeisei a, March thla tir lamah hawn tuma ruahmanna siam mek a ni.