Player chhuak zalen ṭan

Australian Open khel tura player zin lut, coronavirus inkaihhruaina dan avanga khunghran ṭhenkhat chu an chhuak zalen thei ṭan - Pathianniah chuan player 500 vel an chhuak thei tawh tura ngaih a ni.

Grand Slam hmasa ber hi February 8 aṭangin main draw khelh a ni dawn a, a hmain qualifier match a awm ang. Melbourne khawpui an luh aṭanga ni 14 tling tawh, hrilengin a tihbuai lohte chuan nitin darkar 5 chhung training an nei thei tawh dawn.

January thlatir lam khan player leh coaching staff mi 1700 chuangin Australia hi an pan a, an ram sorkar inkaihhruaina dan angin ni 14 chhung an khung hrang hmasa vek - hrileng kaihhnawih neite erawh mahni chenna 'room' an chhuahsan pawh phal a ni lo.

Tunah chuan boruakin ṭhat lam a pan a, harsatna lian tham a thleng a nih loh chuan tournament an khelh hma kar khat chhung vel chu inbuatsaihna hun an nei thei dawn; khunghran nih hian taksa bakah rilru pawh a nghawng nia sawi a ni.

World number 1 leh champion lai ni bawk Novak Djokovic chuan, "Thil thlen dan leh awm dan vel chu a ṭha lam a ni," a ti. Serbian star hian player-te zalen lo lutuk chu a lo sawisel tawh a, a duh ang erawh chuan awmtir a ni lem lo thung.