Chak dan thiam tawh lo Bengaluru!

Bengaluru FC chuan Sunil Chhetri leh Leon Augustine hmangin goal khung hmasa mah se hun tawp nan minute li chauh a awm tawh tihah an khingpui Hyderabad FC chu an si phurh an sut zawh tir a, hun a tawp meuh chuan 2-2 in an inhnehtawk!

Bengaluru tan captain Chhetri chuan minute kuana lekah goal hmahruai a khung a, Cleiton Silva freekick pet aṭanga ball kal chu a tauh lut - minute 61-naah pawh Bengaluru bawkin goal an khung a, kum 22 mi Leon Augustine chuan an goal hnihna a khung. 

Minute 80 pelh thleng pawhin goal dang a lut tawh lo a, Bengaluru hian rei tak hnuah point thum an hlawh chhuak ve mai dawn niin a lang.

Mahse, Hyderabad lamin an khingpui chungah zahngaihna lantir reng an lo tum lo - Aridane Santana chuan minute 86-naah si phurh a rawn sut ṭhen a, Francisco Sandaza chuan hun pek belhah a rawn sut zo zui!

Bangalore club hian tun season-ah result ṭha an neih theih loh avangin coach Carles Cuadrat an ban a, a hmun ruakah assistant coach Naushad Moosa an dah zui.

Mahse, Moosa kaihhruaina hnuaiah pawh Bengaluru an la chak thei chuang lo a, club captain Sunil Chhetri chuan chak awm dan pawh a hriatthiam tawh loh thu a sawi!

India international chuan, "Match riat zet chu kan chak zo tawh lo a, theihtawp chhuah zuia ka theihna zawng zawng nena inbuatsaih chhunzawm leh ka mamawh tih ka hria. 

"Football-ah chuan hnehna chan te, tlawm leh draw-te pawh hi tih dan phunga neih awl em em a ni a, chutiang chuan kan awm tawhin ka hria. Chak loh hi kan ngai neih tawh a, hnehna chana a hlimawmzia pawh ka hrethiam pha tawh lo. Rilru hah tak angin mi in ngai mai thei a, a awm viau e - kan theihna leh chakna zawng zawng nen kan khel a, kan tlawm loh leh draw result kan hlawh chhuak zel si a ni," a ti a, a beidawng hle.