Arsenal mikhual tur Man United

Zanin dar 11:00 hian Arsenal chuan Emirates Stadium-ah Premier League khel turin Manchester United an mikhual dawn, team pahnih intawn hmasaka goal awmchhun khungtu Gunners captain Pierre-Emerick Aubameyang chu a inlan thei dawn em tih a dinhmun a chiang lo.

Boruak ṭha tak, mahse a mawngphah Sheffield United ngam lo hlim ni si Man United lamin point thum nen thawhchhuah leh an tum dawn. Tun hnaia tlarhnung phui tak Gunners tan Bruno Fernandes awmna team ven hi hna hautak a ni ang.

Nikum November thla khan Old Trafford-ah team pahnih an intawng a, minute 69-naah Auba-a'n penalty a khung bak chu goal dang a lut lo. A hnu lamah team pahnih hi tluk leh din fawmin an kal a, nghet takin an la ding thei lo.

Thlasik lai a ni a, table chung bera an awm zeuh chhunga United fans titi chu 'Table chung ber chu a vawt' tih a ni. Tunah erawh Manchester City lakah hmahruaitu nihna dinhmun an chan fel leh tawh, chetsual palh chuan palinaah tla thei an ni leh der tawh.

Ole Gunnar Solskjaer-a'n Sheffield lakah player a siksawi a, a ti fuh lo. Captain Harry Maguire bulah Victor Lindelof emaw Eric Bailly emaw an din theih tawh a rinawm - mual sirah Luke Shaw a awm bawk chuan tlarhnung buaina an chingfel tura ngaih a ni.

Goal nawr kawnga Fernandes pawimawhna inhrilh nawn a ngai lo, tharum ngah Paul Pogba theihna tak lanchhuah theih nan kum upa lam Nemanja Matic ai chuan Fred leh Scott McTominay te an thlanawm zawk a, chutihrualin French midfielder hi mualsirah dah theih a ni bawk.

Edinson Cavani-a'n a thiam la theihnghilh lo a, thawhrim avangin Anthony Martial ten Uruguayan striker aṭangin inzir tur an ngah hle. Mual sir lama Marcus Rashford a awm a nih chuan, Martial ai chuan striker 'class' Cavani nen inthlawp se Gunners tlarhnung tana ven hautak zawk an ni ngei ang.

"A hnung lam aṭangin kan siamṭha ang," tiin Mikel Arteta-a'n Arsenal siamṭhat a tum dan a sawi lawk tawh. Spanish manager-in a naute a khelhtir danin sawisel a hlawh a, an sawisel chhan chu goal an khung tlem bakah an tlarhnung phui chuang si lo kha a ni.

Nikum Krismas ruai ṭheh zan khan Gunners hi Chelsea lakah chiang takin an tlawm - Premier League aṭangin an tla mai ang tih hlauthawng hman pawh an awm hial. Blues an ngam loh hnuah erawh Arteta naute an harh a, tunah chuan beiseina sang tak an nei leh tawh.

League match an khelh hnuhnung parukah chak loh an nei lo, vawi nga chakin ṭum khat an inhnehtawk - goal khat chiah an chhuah! Tun dinhmunah chuan Arsenal innghahna chu an tlarhnung phui a ni tawh a, goal khung kawngah pawh hma an sawn.

Defender rinrawl Rob Holding kawppui turin David Luiz emaw Gabriel an awm a, a sirah Kieran Tierney leh Hector Bellerin te awmin; an kaihza veng truin Thomas Partey leh Granit Xhaka an awm bawk avangin an hneh hnu Man United hneh nawn an inring ang.