Northeast Derby - AFC hmaah Neroca

Aizawl FC-in vawiin tlai dar 2:00 hian an khelh zat ang chiah khel leh an point hmuh ang zat hmu Neroca an hmachhawn dawn. Mizoram club leh Manipur club inkhel tur Northeast Derby hi I League inkhel pawimawh a ni.

Tun season I League hi khelh dan phung a dang a, a sang parukin champion tur an zawng ang a, a hniam pangain tla tur an zawng dawn. Tun dinhmuna table awm dan thlir chuan Aizawl FC leh Neroca hi khawi zawk zawkah pawh awm thei an ni a, chuvangin vawiina an inkhel tur hi a pawimawh hle.

Mizo club hi an match hnuhnung berah Indian Arrows lakah an chesual a, goal khata hun rei zawk hma an hruai hnuin injury time-ah an insuttir. Aizawl FC coach Yan Law chuan, "Kan nauten game plan angin an khel a, chutihrualin khingpuite dah hniam vang leh fimkhur tawk loh vangin point kan insem a ṭul phah. Inzirna atan kan hmang ang," tiin a sawi.

Standly Rozario thlaktu Yan Law hi quarantine mek a nih avangin mual sirah a naute a la ho lo a, Covid-19 vanga dan chi hrang hranga awm hian inkhel result thlengin nghawng a neiah a ngaih theih.

Aizawl FC enkawl ṭhin Gift Raikhan-a kaihhruai Neroca pawhin beisei an pha bik lo. Manipur club hian Indian Arrows 4-0 ngawtin sawp mah se an match hnuhnung berah Gokulam Kerala 4-1 in an hneh lo a, insiamṭhat an mamawh hle.

Zanin dar 7:00 hian league hmahruaitu Churchill Brothers leh table chung lama awm Trau te an inkhel dawn a, inkhel hmuhnawm a beisei theih ang.