Chelsea-ah ka daih rei an ring lo - Tuchel

Chelsea manager thar Thomas Tuchel chuan, "Tu mahin Chelsea-ah hun rei ka hman an ring lo. Ka awm rei emaw rei lo emaw ka sawi duh chu hlauhthawnna ka nei lo, Chelsea anga team ṭha chuan result ṭha an duh ṭhin," tiin result ṭha pawimawhna a sawi.

London club hian Frank Lampard banin PSG-in an ban vanga hna nei lo Tuchel an lalut a, manager thar hnuaia an match hmasa berah Wolverhampton Wanderers nen goal awm loin an inhnehtawk. Blues hian Pathianni zan dar 5:30-ah Burnley an mikhual ang.

Wolves lakah hian point khat chauh hlawh chhuak mah se Tuchel-a naute an khel ṭha hle. Stamford Bridge-a inkhelah goal attempt vawi 14 neiin goal zawnah vawi nga an pet a, Wolves-in goal zawnah an pet ve lo.

Hei chauh hi a ni lo, Chelsea hian ball possession 79% an nei a, ball pawh vawi 898 zet an in pass. Wolves in pass zat vawi 242 nen chuan a in thlau hle. Lampard-a enkawl Chelsea khan Wolves hi 2-1 in an hneh lo tih hriat a ṭha bawk.

Tuchel-a'n rin lawk ang ngeiin tawnhriat nei player a chhawr tam a, season ṭantirha sawi hlawh Timo Wener phei chu goal mamawh laiin bench-ah a ṭhu tluan. Chutihrualin bench aṭanga lut Mason Mount-a'n hmun pawimawh chang turin thiamna a nei tih a rawn lantir a, Burnley nen khelhna hmun a chang a nih pawhin a mak lo ang. Chutiang bawkin German manager hian German forward Werner hi bench-ah a dah reng ring suh.

Blues hmachhawn tur Clarets hi tun hnaiah an che ṭha a, match hnuhnung pathumah an chak vek. An club hnehte hi Liverpool, Fulham (FA Cup) leh Aston Villa te an ni a. Ningani zanah Liverpool-in Tottenham 3-1 in an hneh tih hriat phei chuan Reds hnehtu Burnley hi hmachhawn an châkawm loh sawt ang.