Vawiinah Mizo boxer-te inhnek dawn

Mizo professional boxer pahnih Lalrinsanga Tlau leh Vanlalawmpuia te chu Pro Boxing Event-ah an inlan dawn a, inelna hi vawiin tlai dar 4:30 aṭangin Mumbai Infiniti Mall-ah neih ṭan tur a ni.

Pro Boxing Event-ah hian bout kua a awm dawn a, boxer ṭha 18 an inlan ang. Super Featherweight category-a Mizo professional boxer hmasa ber Sangtea leh Prince Shriwastava te inhnek tur chu main event a ni dawn. Vanlalawmpuia'n professional fight a neihna hmasa berah Co-Main Event a chang pha a, Ashish Sharma nen  Superlightweight category-ah an inhmachhawn ang.

Mizo boxer pahnih coach Sete Lalchuanawma leh Strength and conditioning coach Frederick Lalduhawma ten an hruai a, main sponsor hi Sibyfarms an ni. Coach Sete-a chuan, "Professional boxing hi a hautak a, Mizo ṭhalaiten an theihna pholang tura sum leh paia min ṭanpuitu Sibyfarms leh kawng tinrenga min puitu Pi Mali (LPS), bakah business promoter Dr Lalmuanpuia leh Lalrinzuala te chungah kan lawm hle," tiin Vanglaini a hrilh.

Professional Fight-a Khawruhlian tlangval Sangtea record chu vawi thum chak a ni. Kum 21 mi Sangtea hian Digari Mahesh chu September 22, 2019 khan Delhi-ah a hneh a, hemi hnu hian G Mallikharjuna (TKO) leh Haidari Mchanjo (UD) te chu a hneh leh tawh a ni.

March 6 hian R. Dengṭhuama Hall, Mualpuiah Mizoram professional fight hmasa ber 'LPS Fight Night' a awm dawn a, hetah hian Sangtea leh Ghanaian boxer Eric Quarm ten Super

Featherweight-ah World Youth Title an inchuh dawn. Tun ṭuma Pro Boxing Event a an inhnek tur hi Mizo boxer pahnih tan inpuahchahna ṭha tak a ni thei ang.

Khuangthing tlangval AwP-a hian Indian boxer Rakesh chu Superlightweight category-ah a hmachhawn dawn. LPS Fight Night-ah Mizo boxer ṭha dang Republic Veng tlangval Zochhuanawma Fanai, Cherhlun tlangval F. Zoramchhana leh  Mualpui tlangval C. Lalhruaitluanga te an inhnek bawk dawn a ni.