Mizoram U21 miapa team-in final an lut

Khelo India Youth Games Under 21-ah Mizoram mipa team chuan nizan khan Goa chu penalty shootout-ah 4-2 a hnehin final an lut. 

Shree Shiv Chhatrapati Sports Complex, Balewadi-a semifinal inkhelah hian hun pangngaiah goal a lut lo a, penalty shootout-ah inkhela chungnung zawk Mizoram an vannei ta zawk. Khelo India football U21 mipa final hi January 19, Inrinni tlaiah khelh a ni ang a, Mizoram hian nizana Punjab leh Kerala inkhela chak zawk an hmachhawn ang.

Mizoramin an khingpui hneh vek chungin semifinal an lut a, Goa erawhin an match hnuhnung berah Punjab lakah goal thum an chhuah avangin team ṭha lo zawk an ni tih an inhria.

Football-a tawnhriat nei hmasa Goa-in goal venhim tumin tlarhnung an ngai pawimawh a, thlirna dang aṭang chuan Mizoram football-in nasa takin hma a sawn tih a lang. Kum 2000 chhoah chuan Goa hian engtik lai mahin Mizoram lakah defensive game an khel ngai lo.

Mizoram hian inkhel an thunun, mahse goal khung theihna chinah erawh Goa tlarhnung lamin an tibuai hman zel. Mizoram goalkeeper Lalrinnunga'n first half-ah dan tur nei lo mah se Goa keeper pawhin hna harsa a nei bik lo.

Second half-ah pawh chanchin ngai tho a ni a, Goan player pariat chu goal veng turin tlarhnungah an inhnawh khawm a, player pahnih chu goal nawr na atan an hmang a, Mizoram tlarhnung tan buaina a ni pha lo. Amaherawhchu player pariat dang goal venghim tura dah te chuan an hna an tlin a, Mizoram player te an dang chat a, minute 90 chhungin goal a lut lo.

Extra time awm loin penalty shootout hmangin chak zawk zawn a ni a, Mizoramin an pet hmasa a, PC Lalhriatpuia hmangin an pet goal nghal.

Goa lam aṭanga pet hmasa pahnihin an pet goal lo a, Mizoram tan Lalruatfela pet goal lo mah se a hnu lama pet pathum Vanlalnghenga, Lalmuanawma leh Lalmawizuala ten pet goal vekin 4-2 in hnehna an chang a, Khelo India Under 21 football final an lut.

Mizoram manager Hming-thansanga chuan, "Goa lamin defensive game an khel a, sub-stitution an siam pawhin defender zel an lut a, kan ṭhiat thei thlawt lo a ni. Final kan lut hi kan vannei a, chutihrualin kan naute hi vanneih phu khawpin thu an awih a, an thawkrim bawk," tiin final luh an phu thu a sawi.

Hmingsanga chuan sawi chhunzawmin, "MFA leh Sports Department chungah kan lawm a, kan chanchin an ngaihven a, min ṭawiawm ṭha bawk a, inelna kan hmachhawn kawngah pawh phurna nasa tak min pe a ni," tiin a sawi.

Mizoram coach Chawng-thansanga chuan, "Lalpa kan lawm e, lo ropui ber ang che. Semifinal-a 4-2 a penalty hmanga Goa kan hneh avangin kan lawm e. Kan chakna Mizoram tan kan hlan e," tiin a sawi.

Mizoram team hi coach Chawng-thansanga bakah Hmingsanga leh C. Zirliana (asst manager) ten an enkawl a ni.