Final-ah Mizo boxer pahnih

Khelo India Youth Games 2019-ah Mizo boxer pahnih Zorammuana (Valtea) (48kg) leh Laldinsanga (50kg) ten final an lut a, semifinal lut pha zingah Lalthuthlungdiki (52kg) erawh a vanduai thung.

Mizoram aṭang hian boxer pariat an kal a, Lawngtlai tleirawl Diki chu Saraswati Boro (Assam) laka a chak zawh loh avangin bronze medal a la dawn. Valtea leh Dina ten gold an beisei chhunzawm zel ang.

Tuipui rawlthar Zorammuana hian 48 kg semifinal-ah harsatna a tawk loa, Haryana boxer Kabir Pandit lakah kawng tinrenga chungnungin 5-0 in hnehna a chang. Valtea hian final lut tur hian Madhya Pradesh boxer Anan Yadav (5-0) leh Himachal Pradesh boxer Abhinav Katoch (3-2 ) in a hneh tawh bawk.

Valtea hi Aizawl SAI-ah a awm mek a, nikum November thla khan National School Games, Guwahati-a neihah silver medal a la a, hei hi tun ṭum inelnaa a tel theihna chhan a ni. Final-ah hian Maharashtra boxer Bishwamitra Chongtham a hmachhawn ang.

Laldinsanga leh Haryana boxer Naveen Siwach te 50kg-ah an intum tawk a, referee-in boxer pahnih hi warning vawi khat ve ve an hmu bawk. An point hmuh zat a inang chiah avangin judge ten ngaihdan lak nawn a ni a, Mizo rawlthar hian a attack nasat avangin a vannei ta zawk.

Lunglei SAI-a awm mek Dina hian National School Games quarterfinal-ah Naveen hi a hneh tawh lo a, tun ṭumah erawh a chak zawkah a ṭang thung.

Lunglei Ramthar rawlthar hian final lut tur hian Himachal Pradesh boxer Virender Singh (5-0) leh Uttar Pradesh boxer Javed (3-2) in an hneh. Dina hian nikum khan All India Inter SAI, Rohtak-ah silver medal a dawng a, tun ṭum final-ah hian Maharashtra boxer Aman Yadav a hmachhawn ang.

Mizoram team hi SYS coach pahnih Vulṭhavunga (coach) leh Lalbiaksangi (manager) ten an enkawl a, boxer pahnihin final an thlen avangin an lawm hle.

Mizo coach Vula chuan, "Kan khelh pui tur te hi boxer ṭha tak an nia, chuti chung chuan gold medal pahnih kan lak thei hi kan beisei takzet a ni," tiin Vanglaini a hrilh.

Team manager Sangtei chuan, "Kan khelh danah kan lungawi e. Kan theihtawp chhuahin kan fight ve a, Mizo boxer pahnihin Haryana boxer ve ve kan hneh thei hrim hi kan lawm. Kan phak ang tawkah kan ṭawngtai nasa a, Mizo mipuite pawh ṭawngṭaina min hre reng turin kan ngen a ni," tiin a sawi ve bawk.