Manipur lakah Mizoram an vanduai

Khelo India Under 21 girls-ah Mizoram chuan Manipur 3-0 a hneh loin final an thleng zo ta lo. January 19, Inrinni hian Mizoram hian inelna thlengtu Maharashtra nen pathumna an inchuh ang a. Final-ah Tamil Nadu leh Manipur te an inkhel thung ang.

Mizoram hian Tamil Nadu, Odisha leh Himachal Pradesh nen group khata awm chungin knockout stage an thleng thei a. Semifinal-ah pawh huaisen takin coach Vanlalpeka hoten bul an ṭan a, Manipur an nawr bet zawk.

Amaherawhchu, minute 41-naah Manipur-in goal hmahruai an khung a, a goal dan erawh Peka'n hriatthiam harsa a ti. Mizoram coach chuan, "Kan goalkeeper Baby-i'n a zuan pha lo a, goalline a pelh hmain Feli'n a pet chhuak. Manipur pawhin a goal miau loh avangni celebrate nachang an hre lo a, amaherawhchu linesman-in a phar miau avangin referee-in thutlukna dik lo a siam phah a ni," tiin a sawi.

Second half-ah Manipur-in goal hnih dang an khung belh a, Mizoram tan Lalhriatkimi'n crossbar a pet per a, goal erawh an khung thei lo. Coach Peka chuan, "Vanneih ṭum chu ni se chak thei tur kan ni a, first half-ah Lalhriattiri a che ṭha em em a, ven ngaihna an hre lo. Second half-ah erawh kan dam ṭhat lohna a lang a, Gladys Zonunsangi pawh pum na vangin loh theih loin lakchhuah a ngai a ni," tiin an vanduai thu Vanglaini a hrilh.