Standly hnuaiah Aizawl FC-in bul ṭan dawn

Aizawl FC chuan coach thar  Stanley Henry Rozario hnuaiah bul an ṭan dawn a, zanin dar 7:30 hian hmahruaitu Chennai City chu an buzawl Jawaharlal Nehru Stadium, Coimbatore-ah an hmachhawn ang. 

AFC-in Gift Raikhan-a kaih-hruaina hnuaiah season bul an ṭan a, match 11 aṭanga point kua chauh a hlawhchhuah avangin Manipur coach hian Indian Arrows an hneh loh zawhah banna a thehlut. Mizo club enkawltuten coach banna an pawm a, AFC pro licence nei Standly Rozario chu lalut nghal mah se match hnuhnung bera Real Kashmir an mikhual ṭumin team a la ho hman lo.

Tunah erawh Standly hnuaiah Aizawl FC-in training an nei tawh a, league hmahruaitu Chennai City lakah fiahna an hmachhawn nghal dawn.

 Standly chuan, "Tunah hian match 12-ah point 10 kan hmu a, kan dinhmun hian siam ṭhat a mamawh hle. Chumi tur chuan ka player-te hian theihna an nei a, Chennai City lakah point hmuh ngei kan tum dawn. Point thum kan hmuh theih chuan a lawmawm a, point khatah pawh kan lungawi ang," tiin Vanglaini a hrilh.

Aizawl FC coach thar Standly chuan sawi chhunzawmin, "Player-ten an mamawh chu inrintawkna a ni. Chennai City hi hmahruaitu ni mah se kum hnih liam taa champion chu Aizawl FC hi kan ni a, kan khingpui tur hi team ṭha tak ni mah se  hlauhna chhan tur a awm lo," tiin champion zia neih let a ṭul thu a sawi.

Amaherawhchu Mizo club hian Ansumana Kromah chu hliam vangin an chhawr thei dawn lo a, Mizo striker Lalkhawpuimawia erawh Real Kashmir a hmachhawn theih loh hnuah chhawr theih turin a dam leh tawh.

Chennai City hi an match hnuhnung berah East Bengal an hneh avangin an phur vanglai tak a ni a, an Spanish forward Pedro Manzi chuan tun season-ah goal 11 khung tawhin top scorer a ni mek. 

Singapore lam mi Akbar Nawas kaihhruai Chennai City tan champion tur chuan chetsual a thiang tawh bik lo a, chuvangin RG Stadium-ah pawh an hneh tawh Mizo club lakah point thum an hlawh chhuak lo a nih chuan an lawm lo ang.