Chhinga Vengin Jamshedpur FC an hneh
Chhinga Veng FC chuan nimin tlai khan I League Second Division-ah Jamshedpur FC Reserves chu Lalromawia goal hmangin 1-0 in an hneh a, point thum hlu tak an hlawh chhuak.
Lalsangzuala Hmar hote hian an match hmasa berah Kolkata club Rainbow hmachhawnin goal awm loin an inhnehtawk.
Nimin tlai khan Mohammedan leh Rainbow te 1-1 in an inhnehtawk a, group C hmahruaitu erawh Trau FC an ni a, Manipur club hian nimin khan ATK Reserves chu 3-2 in an hneh a, match hnih khelhah an la chak ve ve.
Chhingcows an chungnung
Chhinga Vengin Mizo hlangin inkhel bul an ṭan a, keeper Zothanmawia chu captain niin tlarhnungah HS Lalṭhazuala, PC Laldinpuia, Vanlalzuidika leh Hmingthanmawia te an awm a, midfield-ah Lalmuansanga leh Lalromawia te an inkawp a, mual sir aṭangin Lalliansanga (Notea) leh Ṭhasiama ten an nawr a, tlarhmaah MC Malsawmzuala, leh MS Dawngliana te an inkawp.
Chhingcows hian an match hmasa bera Rainbow an khelh ṭum ang thoin JRD Tata Sports Complex-ah pawh inkhel an thunun a, Jamshedpur Reserves lamin goal venhim hna an thawk thung. Mizo club tan Dawngtea leh Ṭhasiama ten chance khung lo mah se minute 37-naa Lalromawia goal hmangin hma an hruai.
Jamshedpur lamin penalty aṭangin siphurh sut theihna hun ṭha nei mah se captain T. Mawia'n an penalty pet hi a man chat.
Second half-ah pawh Chhinga Veng an chungnung a, Dawngtea goal hmaah vanduai chhunzawmin a goal ban pet per chu a goal khung teuh ber a ni a, substitute Vanlalbiaa Chhangte pawh goal hmaah a vannei bik lo.
Coach thukhawchang
Chhinga Veng coach Lalsang-zuala Hmar chuan, "Penalty kan chawi dan hi Muansanga ka zawt a, ani hian a khawih fuh loh thu min hrilh a, chuvangin referee thutluknaah hian sawi zui tur ka nei lo. Penalty zawng hi Jamshedpur Reserves chance neih chu a ni a, keini lam erawhin chance ṭha kan hlah hnem hle, insiamṭhat kan ngai hle a ni," tiin Vanglaini a hrilh.
Chhingcows hian January 25 hian RG Stadium, Mualpuiah Mohammedan SC an mikhual ang a, hemi zawh hian Santosh Trophy Qualifier vangin an awl vang vang ang a, February 23-ah Trau FC hmachhawn turin Manipur-ah an zin ang.