Copa del Rey Atletico tan nomawi beiseina a bo

Season hmang ṭha lo tak Atletico Madrid chuan nomawi pakhat an mangṭha ta phawt - Copa del Rey last 16 aṭangin petchhuah an ni a, Spanish Cup an beisei thei ta lo. 

Atletico hian Nilaini zan khan an mikhual Girona chu 3-3 in an inhnehtawkpui a, first leg-ah 1-1 a an lo inhnehtawk tawh avangin away goal rule hmangin rin loh zawk Girona an tlang. 

Inkhel dangah Real Madrid chu Leganes khelmualah 0-1 in tlawm mah se match hmasa lama 3-0 a an lo chak tawhnain a chhan a, inkhel pahnih belhkhawmah 3-1 a chakin quarterfinal an lut. 

Nizan zanlaiah Barcelona chuan Levante an mikhual a, he thu buatsaih a nih lai hian an result kan hre hman lo. 

Atletico Madrid leh Girona hi match hmasa lamah 1-1 in inhnehtawk mah se an intawn lehna tur hmun hi Atletico khelmual Wanda Metropolitano a ni a, Madrid khaw club hi tlang chiang tura ngaih tho an ni. 

Beisei lawk ang ngeiin Atletico-in goal an khung hma a, Nikola Kalinic chuan minute 12-na lekah goal hmahruai a khung a, Atletico ṭantu ten hahdam taka chak turah an inngai. 

Mahse Girona an beidawng duh bik lo. Valery Fernandez chuan minute 37-naah an si phurh a rawn sut a, goal dang lut loin chawlhlawk hman a ni. 

Second half-ah rin loh zawk Girona lamin goal an rawn khung a, kum 32 mi Cristhian Stuani chuan minute 59-naah Girona hmahruaina goal a rawn khung - Atletico an hawihai. 

Atletico-in mahni mualah Girona laka tlawm an tum lo. Angel Correa chuan minute 66-naah an si phurh a rawn sut ve leh a, mahse 2-2 a inkhel a tawp chuan tlang tur zawk chu Girona an ni. 

Hei hi hriain tun hnaia khel ṭha tluang tak Antoine Griez­mann chuan Atletico tan minute 84-naah an goal thumna a khung leh a, hun a tlawm tawh bawk avangin Madrid khaw club hi an tlang mai dawn niin a lang. 

Mahse, beisei ang ngawtin thil a kal lo. Hun tawp nan minute hnih chiah a awm tawh tihin Seydou Doumbia chuan an si phurh a rawn sut ve leh a, Atletico tan thawhna hun a awm tawh lo; 3-3 in an inhnehtawk a, khualmuala goal khung hnem zawk Girona an tlang. 

Atletico-in result duhawm lo tak an nei a, hemi piahlamah hian chanchin lawmawm lo dang an nei - midfielder Saul Niguez chu second half ṭantir­ah hliam vangin lak­­­chhuah a ni a, Spanish club hian Diego Costa chu hliam vangin an chhawr thei lo mek bawk.

Copa del Rey last-16 second leg inkhel dangah Real Madrid tlawm mah se first leg-a an result avangin an tlang ta tho a, champion an tum a nih erawh chuan insiamṭhatna tur an ngah tih an hai bik lo ang. 

Leganes tan hian Martin Braithwaite chuan he inkhela goal awmchhun hi a khung a, mahse Leganes hian match hmasaah goal thum an chhuah avangin goal hnih dang khung an tan a harsa - Middlesbrough aṭanga loan-a an hawh Braithwaite hian goal a khung bakah hian post a pet per.

Hriat tel atana ṭha erawh Real Madrid hian hliam vangin Karim Benzema leh Gareth Bale an chhawr thei lo a, coach Santiago Solari chuan player pawimawh Luka Modric leh Sergio Ramos chu a chawlh hahdamtir bawk. 

Real Madrid tana player langsar ber chu Keylor Navas a ni a, Costa Rican keeper hian Real chhanhim turin vawi tam save a nei - hei erawh Real tan in enfiahna tur a ni.