Thierry Henry leh Patrick Vieira inhnehtawk

Arsenal legend pahnih Thierry Henry leh Patrick Vieira te chu manager an nih hnua a vawi khat nan an intawng a, Nilaini zan French Ligue 1 inkhelah AS Monaco leh Nice te chu 1-1 in an inhnehtawk.

Stade Louis II-a inkhelah Nice lamin minute 30-naa Allan Saint-Maximin hmanga goal hmahruai an khung chu second half-ah Monaco defender Badiashile Mukinayi-a'n a sut a, goal dang a lut zui lo. 

Nice midfielder Ihsan Sacko chu chawlhlawk hma deuhin hnawhchhuah a ni a, hun chanve hnulam player tam zawk ni chunga khel Monaco lamin chakna goal an khung thei bik chuang lo a ni.

Vieira leh Henry te hi player an nih laiin club leh ram tan an khel dun a, Vieira hian Premier League nomawi pathum chawiin Henry-a'n ṭum hnih a chawi thung. 2003-04 season khan Arsenal chu EPL-ah hneh loh nei loin an champion pui a, tun thlengin he record tluk thei hi an la awm lo.

Kum 42 mi Vieira hian inkhelh a chawlhsan hnuah Major League Soccer club New York City a enkawl tawh a, an ram club Nice hi nikum June thla aṭang khan a enkawl ṭan. Henry erawh Belhium assistant coach a nih hnuah ama puala a team enkawl hmasa ber ni turin October thla khan Monaco hi a zawm.