Son-a hoin South Korea chak nghal

Tun hnai Asian football-a hming langsar bera chhal ngam Son Heung-min chuan a vawi khat nan Asian Cup-ah a hmel a lan ve ta a, China lakah South Korea chu 2-0 in hnehna a chanpui nghal. 

Taeguk Warriors (South Korea sawina) tan Hwang Ui-jo leh Kim Min-Jae ten goal khat ve ve an khung a, he goal hi Tottenham Hotspur forward Son-a ke aṭanga chhuak ve ve a ni. 

Kum 26 mi forward hian minute 14-na lekah China penalty box-ah ball lalutin Chinese defender Shi Ke chuan a lo ti tlu a, referee-in penalty spot a kawk.

South Korea tan Hwang Ui-jo chuan penalty hi petin goal-ah a chantir a, South Korea-in hma an hruai hma hle. Taeguk Warriors hian second half-ah an goal hnihna erawh an khung leh chauh. 

Goal hnihna pawh hi Son-a thawhchhuah tho a ni. Tottenham forward corner pet chu Kim Min-Jae chuan chiang zetin a tauh lut a, South Korea an chak chiang hle. 

South Korea hian match thum an khelhah hnehna chang vekin Group C-ah chiang takin hma an hruai a, last 16 an lut chiang hle - match hnih hnehna chang China-in an lut bawk. 

Ningani zan inkhel dangah Kyrgyzstan chuan an duh ang tak result hlawh chhuakin Philippines chu 3-1 in an hneh a, match khatah chiah hnehna chang chungin last 16 an lut. 

Kyrgyzstan hian match khatah chiah hnehna chang mah se goal difference lamah an dinhmun a ṭhat avangin pathumna ti ṭha pali zingah an tel chiang a, hei vang hian knockout round an lut. 

Kyrgyzstan  tan Vitalij Lux chuan goal thum khungin hattrick a siam a, German fourth division club SSV Ulm 1846 tana khel forward hian minute 24-naah goal hmahruai khungin second half-ah goal hnih a khung. 

England coach hlui Sven-Göran Eriksson enkawlna hnuaia khel Philippines tan Stephan Schrock chuan minute 80-naah goal khat khung ve mah se awmzia a nei lo. 

Philippines hian match hmasa pahnihah South Korea leh China ngam loin goal an khung miah lo a, Hoffenheim leh Eintracht Frankfurt tan pawha khel tawh Schrock hi Asian Cup-a Phi­lippines goal neihchhun khung­tu a ni tihna a ni. 

Ningani zana inkhel ngaihven hlawh ber pawlah Iran leh Iraq chu goal khung loin an inhnehtawk a, team pahnih hian last 16 an lut. 

Vietnam-in 2-0 in Yemen an hneh - Nguyen Quang Hai chuan freekick hmangin goal mawi zet a khung a, captain Que Ngoc Hai chuan penalty hmanga khung bawkin Yemen-in chhanletna tur an nei lo. 

Vietnam hian last 16 an luh dawn leh dawn loh he thu buatsaih a nih lai hian a la chiang lo a, nizan inkhel result a zirin an dinhmun a chiang ang.